Vetëvendosje ka çuar për gjykimin në Kushtetuese dekretin e presidentit Thaçi për mandatimin e Abdullah Hotit si kryeministër i ri, e kreu i LDK-së tha se është i gatshëm ta respektojë vendimin e Gjykatës kur ai të jepet.
“Jemi të gatshëm që në çdo moment të shkojmë në Kuvend e të bëhet qeveria, por jemi të gatshëm të respektojmë çdo vendim të Gjykatës Kushtetuese sa i përket këtij procesi. Ne jemi të bindur se procesi është i rregullt dhe nuk ka asnjë shkelje”, tha Isa Mustafa, referuar inisiativës së VV.
Nga ana tjetër, ai kundërshtoi pretendimin e kësaj të fundit për pezullimin e dekretit të Thaçit.
“Në asnjë rast nuk ka arsye që të merret masë e parakohshme ndaj dekretit të Thaçit sepse konsiderohet që të gjitha arsyet që janë dhënë në kërkesën e VV-së janë paragjykime dhe të pabazuara”, tha Mustafa.
VV pretendon se mandatimi i Abdullah Hotit nga ana e presidentit Thaçi, është anti-kushtetuese.
Kështu e ka konsideruar dhe konstitucionalisti i njohur Riza Smaka.
“Sikundër të isha një nga gjykatësit e Gjykatës Kushtetuese, pa dilema dhe pa hezitim do të votoja për miratimin e kërkesës së LVV-së ngase rasti i votimit të mosbesimit të Qeverisë nuk trajtohet dot me dispozitën e nenit 95 të Kushtetutës, madje edhe po t’i referohemi atij rasti sipas saj ekskluzivisht do të kishte të drejtë subjekti politik me shumicë të mandateve në Kuvend pra LVV-ja për ta propozuar kandidatin për formimin e Qeverisë”, ka thënë Smaka. /tesheshi.com/
