Duke kremtuar “7 marsin”, Ditën e Mësuesit, presidenti Meta ka përcjellë një apel për atë që po ndodh në sistemin arsimor shqiptar, ku nuk po mungojnë plagosjet apo deri vrasjet me thikë të nxënësve, brenda apo jashtë oborrit. I pranishëm te “Fan Noli” në kryeqytet, aty ku dikur mësonte dhe vetë, kreu i shtetit bëri apel që jo vetëm shkolla por dhe familja, ose që të dyja bashkë, të bëhen udhërrëfyese të një morali te moshat e vogla.
“Për të evituar sidomos dështimin e nxënësve në të ardhmen, sot është koha për të bërë një apel të fortë për një bashkëpunim më intensiv mes shkollës dhe familjes, siç dhe ka qenë në të kaluarën, sepse familja ka një rol shumë të rëndësishëm për edukimin e fëmijëve dhe për të ndjekur mbarëvajtjen e tyre në shkollë. Pasi shkolla sot është ambient më i ekspozuar ndaj disa fenomeneve që janë serioze dhe shqetësuese për të rinjtë, fëmijët, familjet tona dhe shoqërinë tonë”, theksoi presideti Meta. /tesheshi.com/
