Presidenti i Autoritetit Palestinez, Mahmoud Abbas priti ligjvënës të parlamentit izraelit, nga partia e krahut të majtë Meretz, pas djegies së një foshnjeje 18-muajshe në një sulm që dyshohet se është kryer nga të vendosurit izraelitë në territoret palestineze.
Media lokale raportoi se Abaz tha gjatë takimit me përfaqësuesit e partisë izraelite që mbështet paqen përmes krijimit të dy shteteve, se vrasja e foshnjes është një krim kundër njerëzimit dhe një krim lufte.
Ekstremistët hebrenj besohet se qëndrojnë pas sulmit në fshatin Duma në Bregun e pushtuar Perëndimor, sulm nga i cili u lënduan edhe pjesëtarët e tjerë të familjes kur shtëpisë së tyre iu vu zjarri.
Sipas Jerusalem Post, Abbas theksoi se: “Nuk mund të themi se është një krim i kryer nga një i cmendur. Kemi nevojë që sulmi të shihet si akt terrorist. Shprehjet e keqardhjes dhe dënimi me fjalë nuk janë mjaftueshëm. Duhen ndërmarrë hapa të besueshëm kundër terroristëve që djegin familje”.
Kryetarja e partisë Meretz Zehava Gal-On u shpreh e tronditur nga sulmi. Sipas saj, duhen ndërmarrë pasa të forta ndaj terrorit hebre, t’i jepet fund pushtimit dhe të rinisë procesi i paqes.
Abbas akuzoi kryeministrin Netanjahu se refuzon të marrë pjesë në negociatat e paqes. “Arma e tij më e fuqishme është Intifada”, tha Abbas, duke iu referuar revoltës palestineze kundër pushtimit izraelit. /tesheshi.com/
