Izraeli vrau liderin e Hamasit Ismail Haniyeh për të zgjatur luftën kundër Gazës, sipas presidentit palestinez Mahmud Abbas.
Në një intervistë të publikuar në rusisht nga agjencia shtetërore ruse RIA të martën, Abbas tha se vrasja ishte “një akt frikacak dhe një zhvillim i rrezikshëm i situatës në politikën izraelite”.
“Nuk ka dyshim se qëllimi i vrasjes së zotit Haniyeh ishte zgjatja e luftës dhe zgjerimi i saj,” tha ai. “Kjo do të ndikojë negativisht në negociatat në vazhdim për t’i dhënë fund agresionit dhe tërheqjen e trupave izraelite nga Gaza.”
Abbas tha se do të diskutonte konfliktin me presidentin rus Vladimir Putin në Moskë.
Agjencia citoi një burim diplomatik të thoshte se Abbas do të jetë në kryeqytetin rus nga 12 deri më 14 gusht.
Ai pritet të qëndrojë në Turqi nga data 14 deri më 15 gusht.
Njoftimi për hakmarrje
Haniyeh u vra javën e kaluar në kryeqytetin iranian, Teheran, në një sulm që shkaktoi kërcënime për hakmarrje kundër Izraelit dhe frikën se konflikti në Gaza do të përhapej.
Haniyeh ka qenë fytyra e diplomacisë ndërkombëtare të Hamasit që nga fillimi i luftës më 7 tetor të vitit të kaluar dhe ka qenë i përfshirë në përpjekjet e ndërmjetësimit ndërkombëtar për të arritur një armëpushim në Gaza.
Irani fajësoi Izraelin për vrasjen dhe u zotua për hakmarrje. Por zyrtarët izraelitë nuk e kanë marrë përgjegjësinë.
Rusia, e cila ka krijuar lidhje të ngushta me liderin suprem të Iranit, Ayatollah Ali Khamenei dhe udhëheqësit arabë, dënoi vrasjen e Haniyeh dhe u bëri thirrje të gjitha palëve që të përmbahen nga destabilizimi i mëtejshëm në Lindjen e Mesme.
Ai gjithashtu kritikoi përsëri Perëndimin për injorimin e nevojës për një shtet të pavarur palestinez brenda kufijve të vitit 1967.
Bisedimet ruso-iraniane
Të hënën, Sergei Shoigu, sekretari i Këshillit të Sigurisë Ruse, foli në Teheran me presidentin iranian Masoud Pezeshkian, i cili tha se ishte i vendosur të zgjeronte lidhjet me “partnerin strategjik Rusinë”.
“Rusia është ndër vendet që qëndruan pranë kombit iranian në kohë të vështira”, tha Pezeshkian për Shoigu, raportoi media shtetërore iraniane.
Presidenti tha se qëndrimet e përbashkëta të Iranit dhe Rusisë “në promovimin e një bote shumëpolare sigurisht që do të çojnë në siguri dhe paqe më të madhe globale”.
Zëdhënësi i Departamentit Amerikan të Shtetit, Matthew Miller, komentoi vizitën e Shoigut në Teheran, duke thënë se Shtetet e Bashkuara nuk prisnin që Rusia të luante një rol produktiv në zbutjen e tensioneve në Lindjen e Mesme.
Miller tha se Uashingtoni, përmes angazhimeve të tij diplomatike, inkurajoi vendet t’i tregonin Iranit se një përshkallëzim në Lindjen e Mesme nuk ishte në interesin e Teheranit. Presioni diplomatik është rritur për të parandaluar një përshkallëzim midis Iranit dhe Izraelit. /tesheshi.com/
