Disa fraza “pa mend” nga ana e kryeministrit shqiptar të Malit të Zi, Dritan Abazoviç, i ka sjellë atij jo pak telashe, deri në kërkim falje. Ai mbajti një fjalim në 27-vjetorin e genocidit në Srebrenicë, në kompleksin memorial në Potoçari, duke lënë një shije jo të mirë në ato që tha, pas së cilave pasuan reagime të shumta nervoze. 
Së pari, ai shmangu përmendjen e serbëve si autorë të qartë të asaj masakre, duke thënë se “sa të këqij ishim”, pra vënë një shenjë barazimi mes palëve.
“Më 11 korrik 1995, njerëzimi u vra, por Bosnja vazhdoi të jetonte. Përkujtimi simbolik i sotëm është vetëm një kujtesë se sa të këqinj ishim atëherë. Jo vetëm ata që jetonin këtu, në zonë, por edhe për ata që mendohej se kishin ardhur në ndihmë. Sot, 27 vjet pas kësaj, në Ballkan ende jeton fryma e urrejtjes, fryma e përçarjes, e cila, për fat, nuk manifestohet me ngjarje lufte, por manifestohet me politika të gjuhës së urrejtjes ose mohimit të urrejtjes”, tha Abazoviç.
Pasi barazoi të gjithë në faj, siç komentuan mediat boshnjake, Abazoviç tha gjithashtu se gjenocidi nuk është kryer ndaj boshnjakëve dhe se nuk është bërë nga ushtria por nga politikanët.
“Le të na kujtojnë këto pamje gjenocidin kundër viktima të pafajshme, jo boshnjake, por njerëzve. Nuk u krye nga
ushtritë, por nga politikanët – politika e së keqes, vdekjes dhe mashtrimit. Prandaj duhet ta ndryshojmë realitetin, të shikojmë njëri-tjetrin në sy”, tha Abazoviç, sërish duke shmangur përmendjen e serbëve.
Orë më pas erdhi kërkim falja e tij.
“Më falni nëna të Srebrenicës për mendimet e shprehur në mënyrë të paqartë.
Dihet se çdo veprim varet nga qëllimi i tij. Qëllimi im është paqja.
Gjenocidi i kryer ndaj boshnjakëve në Srebrenicë nuk duhet t’i përsëritet askujt”, shkroi Abazoviç. /tesheshi.com/
