Nënkryeministri malazes Dritan Abazoviç kërkoi ndihmë nga Bashkimi Evropian në shlyerjen e kredisë që Mali i Zi mori nga një bankë kineze për ndërtimin e pjesës së parë të seksionit të autostradës Bar-Boljari.
Ai i tha Komitetit për Punë të Jashtme të Parlamentit Evropian (AFET) se problemi i madh është borxhi ndaj Kinës.
“Ju lutemi na ndihmoni të kthejmë ato para, të këmbejmë atë hua me një hua me një bankë evropiane, të përfundojmë bashkëpunimin me një institucion financiar evropian dhe t’i japim fund ndikimit kinez,” tha Abazoviç.
Seksioni i parë i autostradës në Mal të Zi, i cili duhet të kalonte nga Deti Adriatik (Tivari) deri në kufirin me Serbinë (Boljare), ishte menduar të përfundonte në maj 2019, por për shkak të afatit të prishur, një aneks i kontratës ishte nënshkruar për afatin e ri të 30 shtatorit 2020. Por as ky afat nuk u respektua.
Sipas qeverisë, një pushim i ri në afatin e përfundimit të ndërtimit të seksionit të parë të autostradës në Malin e Zi nga Podgorica në Kolasin kërkon nënshkrimin e një aneksi të ri të kontratës midis qeverisë së Malit të Zi dhe kompanisë kineze CRBC.
Çmimi i rënë dakord fillimisht ishte 809 milion dollarë, dhe më pas ai u rrit me 90 milion të tjerë për ndërtimin pasues të rrugëve hyrëse në Podgoricë dhe infrastrukturës komunale përgjatë autostradës. /tesheshi.com/
