Kryeministri i Malit të Zi Dritan Abazoviç tha mbrëmë se është i gatshëm të japë dorëheqje, duke komentuar njoftimin e Partisë Demokratike të Malit të Zi, e cila më herët tha se ai duhet të largohet nga posti pas zgjedhjes së organeve të drejtësisë.
Abazoviç tha se në parim e mbështet qëndrimin e Kryesisë së kësaj force, e cila i bëri thirrje Kuvendit të mos shqyrtojë iniciativat e mundshme për shkurtimin e mandatit para se të zgjidhen katër anëtarë të Këshillit Gjyqësor dhe së paku një gjyqtar i Gjykatës Kushtetuese.
“Të gjithë, pasi duhet të kemi një konsensus më të gjerë për zhbllokimin e gjyqësorit, të Gjykatës Kushtetuese, të drejtësisë… Le të kontribuojmë të gjithë për të dhe të themi: ‘Mirë, le të shkojmë në zgjedhje të reja, qeveri, rindërtim apo ndonjë model tjetër.’ Por para kësaj le të bëjmë disa punë së bashku. Nëse kolegët e mi nga demokratët, nëse e kam interpretuar saktë deklaratën, nëse ka kohë… jam gati të jap dorëheqje”, tha Abazoviç për TV Vijesti.
I pyetur nga redaktori i emisionit nëse ka ardhur koha për t’ia dorëzuar stafetën dikujt tjetër, Abazoviç tha se ajo që propozoi qeveria funksionoi.
“Mali i Zi në shumë mënyra është i ndryshëm nga 30 gushti 2020 dhe të gjitha proceset që kanë ndodhur nuk kanë ndodhur në dëm të Malit të Zi. Ky ishte detyrimi ynë. Ndonjëherë ndihemi të vetmuar në mbrojtjen e Malit të Zi civil, kjo manifestohet shpesh, por më e rëndësishmja është se procesi vazhdon dhe askush nuk mund ta ndalë atë”, tha Abazoviç. /tesheshi.com/
