Nuk kanë të ndalur zërat në opinionin publik kosovar që partinë e Ramush Haradinajt e shohin çdo ditë e më të afërt me PDK-në e Kadri Veselit, duke aluduar se këto dy parti do të formojnë koalicionin qeverisës pas zgjedhjeve të reja, kurdo që të mbahen ato.
Por AAK i quan këto zëra spekulime nëpërmjet një komunikate, duke thënë se afrimi me PDK-në është pjesë e zërave që janë kundër ndryshimit.
“AAK vlerëson se propaganda për gjoja afrimin e AAK-së me PDK-në është pjesë e spekulimeve të disa strukturave politike, individëve dhe mediave të caktuara, të cilët janë kundër këtij ndryshimi dhe po e mbrojnë me mercenarizëm ‘statukuonë’ në vend. AAK është përcaktuar për ndryshim,” thuhet në komunikatën e AAK-së.
AAK thotë se është e vendosur që boshti opozitar në Kosovë ta fokusojë gjithë veprimin e vet në ndaljen e Serbisë që t’i fusë duart në Kosovë dhe në ndaljen e keqqeverisjes në vend, duke i konsideruar këto si dy telashet më të mëdha me të cilat përballet sot Kosova.
“Është konstatuar se ndalja e këtyre dy rreziqeve shënon hapin vendimtar të ndryshimit të domosdoshëm në vend, dhe AAK-ja beson fuqishëm se qëndrueshmëria e këtij kundërshtimi është garanci e ndryshimit. Ka qenë qëndrim unanim që AAK-Nisma dhe partnerët e tjerë të Boshtit Opozitar të jenë të palëkundur në kursin aktual të veprimit politik, të kundërshtimit të Demarkacionit dhe të Asociacionit në versionin aktual, e të jenë të vendosur në përjashtimin e çdo koalicioni të mundshëm parazgjedhor,” lexohet mes të tjerash në komunikatën e AAK-së. /tesheshi.com/
