Zyrtarë të Aleancës për Ardhmërinë e Kosovës në konferencën e fundit për këtë vit kanë kritikuar qeverisjen e Isa Mustafës e njëkohësisht kanë thënë se falë veprimeve të opozitës së përbashkët kanë ndalur marrëveshjet që ata i cilësojnë të dëmshme për vendin.
“AAK ka shpresuar që në këtë vit qytetarët dhe Kosova të kenë dy lajme të mira: atë të liberalizimit të vizave si dhe anëtar të UNESCO-s apo të kemi kodin telefonik, por për shkak të qeverisë së keqe, në këtë fundvit e ka shumë të vështire që të dalë dhe të japë një lajm të mirë”, tha nënkryetari i kësaj partie Ardian Gjini.
Sipas Gjinit edhe rritja ekonomike prej 3 për qind e proklamuar nga qeveria nuk është e vërtetë.
Ai shtoi se Aleanca është e bindur që Mustafa nuk mund ta përfaqësojë Kosovën në arenën ndërkombëtare dhe se nuk ka besueshmëri për këtë.
Gjini më pas ka theksuar se nuk ka mbetur asgjë tjetër, pos shkarkimit të Mustafës në fillim të vitit 2016.
“Ekziston mundësia se në rast se mbahen zgjedhjet, opozita të shkojë me platformë të përbashkët edhe pse është ende herët”, ka thënë Gjini.
Ndërsa, nënkryetari tjetër i AAK-së, Ahmet Isufi tha se kjo qeveri që nga pas lufta është qeveria më e korruptuar dhe kjo qeveri ka dështuar në qeverisjen e vendit.
“Gjendja që nga paslufta nuk ka qenë më e rëndë dhe për ta kthyer një shpresë për qytetarët dhe për vendin tonë vendi ynë duhet të shkojë në zgjedhje”, tha Isufi./tesheshi.com/
