Aleanca për Ardhmërinë e Kosovës ka reaguar lidhur me arrestimet e ndodhura së fundi në Kosovës, në radhët e aleates së saj në opozitë, Vetëvendosje. Sipas partisë së Haradinajt, nuk ka dyshim që arrestimi i zëdhënësit, Frashër Krasniqi dhe i shefit të Grupit Parlamentar të kësaj partie, Glauk Konjufca, si dhe paralajmërimet për arrestime të tjera të mundshme të aktivistëve të VV-së, ndfërmerren pikërisht një ditë para protestës së madhe të opozitës në Prishtinë.
“Një ndërmarrje e kalkuluar, në mënyrë që të reflektojë keq dhe të nxisë dhunë në protestën e nesërme”, thuhet në deklaratën e AAK-së
“Por opozita është shumëfish më e përgjegjshme dhe nuk do t’i nënshtrohet skenarëve të krerëve të pushtetit për një protestë të dhunshme, edhe ashtu të paralajmëruar, të sajuar e të deklaruar publikisht tash e sa ditë. Protesta e 17 Shkurtit do të jetë qytetare dhe paqësore, prandaj kërkojmë që pushteti të mos e provokojë atë me skenarë të gatuar në kuzhinat e tyre politike, aq më tepër ta shfrytëzojë gjyqësorin për hesap të vet”, theksohet në deklaratën e Aleancës për Ardhmërinë. /tesheshi.com/
