Vetëm diç më shumë se një muaj nga ndërtimi i qeverisë “Haradinaj” kanë nisur edhe plasaritjet e para se kush ka më shumë hise në tortën e pushtetit.
Çuditërisht për këtë gjë janë kapur dy partnerët e vegjël që lidhën koalicion parazgjedhor, AAK e NISMA.
Është zyrtari i lartë i Aleancës, Lulzim Kabashi njëherit kandidat për kryetar të Prizrenit i cili të enjten në një debat televiziv në RTV Dukagjini tha se partia e Fatmir Limajt ka marrë hise më të madhe në qeveri se sa i takon.
Kjo deklaratë e tij nuk është pritur mirë nga NISMA për çka ka nxitur reagimin e deputetit Haxhi Shala.
Ky i fundit i ka kërkuar Kabashit të mos bëhet mosmirënjohës. Pasi, qëndrimi siç është shprehur ai konsekuent i NISMA-s ka bërë që Haradinaj të jetë kryeministër.
“Më vjen keq që një zyrtar i lartë i AAK-së siç është Luli të thotë diçka të tillë. I them Lulit dhe të gjithë atyre që mendojnë sikur ai, se është NISMA ajo që e ka bërë të mundur që Ramush Haradinaj sot të jetë kryeministër. Lul, falë qëndrimit konsekuent të NISMA-s dhe kryetarit Limaj, ti dhe AAK jeni në pushtet qëndror. Falë NISMA-s edhe ti ke pasur mundësi që gjatë kësaj fushate të bësh premtime për fushatën në të cilën ti je kandidat për kryetar. Lul, mirënjohja është më e pakta që pritet në këto raste”, thuhet në reagimin e Shalës. /tesheshi.com/
