Aleanca për Ardhmërinë e Kosovës (AAK) ka reaguar ndaj disa lajmeve të publikuara në media, sipas të cilave, i pari i kësaj partie ka pasur takim me Kadri Veselin dhe eksponentë të LDK-së, për të hyrë në qeveri.
AAK përmes një reagimi dërguar mediave ka thënë se këto informata janë një “rrenë” e madhe.
AAK thotë se nuk e ka në plan të hyjë në këtë qeveri. AAK, mund të behët pjesë e një qeverie, vetëm pas zgjedhjeve.
“As njerëzit e AAK-së, e as Ramush Haradinaj, nuk kanë pasur biseda me Kadri Veselin, as me eksponentë të LDK-së, as me ndërkombëtarë, për t’u bërë pjesë e qeverisë. Të gjitha informatat për këtë janë një rrenë e madhe”, thuhet në reagim.
Aleanca e Haradinajt, thotë se me asnjë çmim nuk do të bëjë veprime, që do ta rehabilitonin dhe do ta amnistonin qeverinë aktuale, të cilën AAK e konsideron agresion në sistemin kushtetues dhe territorit të vendit.
“Krejt çka kërkojmë nga kjo qeveri, është që ajo të japë llogari për veprimet antikushtetuese, të japë dorëheqje dhe t’i hapë rrugë zgjedhjeve të reja!”, thuhet në reagimin e AAK-së. /tesheshi.com/
