Nga Blendi Gashi
Opozita kosovare, konkretisht dy partitë më të mëdha, Vetëvendosje dhe Aleanca për Ardhmërinë e Kosovës (AAK), edhe pse thonë në vazhdimësi se janë të bashkuara, çdo ditë e më shumë po punojnë për të kundërtën, të paktën duke parë deklarimet e tyre të fundit.
Dy partitë në fjalë nuk i ndan më vetëm çështja e listës së përbashkët zgjedhore, por edhe një nga kauzat që i bëri bashkë për të kundërshtuar qeverinë “Mustafa”: Demarkacioni me Malin e Zi.
Ky mospajtim ka të bëjë me çështjen se a duhet të kërkohet hetim ndërkombëtar, konkretisht nga Byroja Federale të Hetimeve (FBI) për Demarkacionin, pas vendimit të ekspertëve ndërkombëtarë se kufiri me Malin e Zi është në rregull, ndërkohë që janë njëzëri se duhet të kundërshtohet vendimi.
Hetim ndërkombëtar nga FBI-ja po kërkon kreu i AAK-së Ramush Haradinaj. Ky i fundi, e kërkon për Murat Mehën, kryetarin e komisionit, por dhe anëtarët tjerë.
Lideri i Aleancës, përmes një letre që i dërgoi të enjten presidentes Jahjaga, kërkoi prej saj që të ftojë Byronë Federale të Hetimeve për të zbardhur të vërtetën për rolin kriminal, siç thotë Haradinaj, që kanë pasur anëtarët e komisionit shtetëror.
Ai ka thënë se as komisioni ndërkombëtar i angazhuar nga Jahjaga nuk ka prodhuar rezultat.
Konjufca, nuk pajtohet me Haradinajn
Por partneri i AAK-së, partia tjetër opozitare Lëvizja Vetëvendosje nuk mendon se është ide e qëlluar kërkesa e Haradinajt që Demarkacioni të hetohet nga FBI.
Deputeti i VV-së, Glauk Konjufca, tha se nuk e di nëse në këtë çështje mund të ketë punë edhe FBI-ja.
“Nuk ma merr mendja se do të ishte në kompetence të Departamentit të FBI-të që të merrej me hetimin e Demarkacionit mes shteteve. Unë, sa e di tjera janë kompetencat e FBI-të”, ka thënë Konjufca.
Profesor Qorrolli: Arbitrazhi i heq dilemat
Profesori i së drejtës ndërkombëtare në Universitetin e Prishtinës “Hasan Prishtina”, Vigan Qorrolli, thotë se nuk mund të komentojë nëse me Demarkacionin duhet të merret FBI, por shton se çështja në fjalë duhet të dërgohet në marrëveshje mes dy shteteve në Gjykatën Permanente të Arbitrazhit në Hagë.
“Secilën dilemë e heq vetëm Arbitrazhi. Dy palët, Kosova dhe Mali i Zi – duhet ta zgjidhin këtë çështje me arbitrazh ndërkombetar. Zatën, edhe Kroacia me Slloveninë për 20 vjet nuk jane ‘ujdis’. Arbitrazhi në fund, ua ka heq të gjitha dilemat”, ka thënë profesor Qorrolli, për tesheshi.com.
