Pas zvarritjes së gjatë të procedurës penale, sot më shumë se një vit nga dhuna e 27 prillit në Kuvendin e Maqedonisë, Gjykata penale e Shkupit ka shqiptuar dënimin me burg 7 të akuzuarve për tentim vrasje të deputetit shqiptar, Ziadin Sela.
Aleksandar Janevski – Toshta u dënua me 13 vjet burg.
Nikollçe Dimitrievski me 10 vite e 6 muaj vite burg.
Nikolla Vojminovski 13 vite e 6 muaj burg.
Oliver Oshavkovski u dënua me 13 vite burg.
Kire Gjorgjievski 13 vite burg.
Andrej Micov 10 vite e 6 muaj burg.
Kosta Dellov 10 vite e 6 muaj.
Pra gjithsej për 7 të akuzuarit gjykata ka shqiptuar dënimin prej 82 vite burg.
Ndërkohë gjatë shqiptimit të dënimit, gjykatësja Sllavica Andreevska arsyetoi vendimin e saj me provat materiale dhe verbale që tha se kanë dëshmuar përfshirjen e të dënuarve në tentim vrasjen e Zijadin Selës.
Andreevska tha se ata e kanë kryer veprën me paramendim dhe veprimet e tyre kanë shkaktuar frikë dhe pasiguri tek qytetarët. Gjykatësja kujtoi se Toshta e ka dorëzuar Selën tek i akuzuari Nikolla Vojminovski i cili më pas e ka hedhur Selën në turmën e cila e ka rrahur deri në pavetëdije. Kujtoi edhe faktin se Kire Gjorgjievski e ka goditur Selën edhe pasi ishte alivanosur dhe ka kërcënuar se do tu ndodhin këto gjëra edhe të tjerëve. Edhe për Oliver Oshavkovski kujtoi se e ka goditur Selën me shqelm në kokë, derisa ishte pa vetëdije. Sllavica Andreevska e theksoi gjendjen e Zijadin. Selës pas rrahjes që ka patur mundësi tia merr jetën.
Gjithashtu kujtojmë se më parë, i akuzuari Sasho Senkov u lirua nga akuzat, ndërsa Stojan Pavlevski dhe Cejo Gjorgjievski, u dënuan me nga 3 dhe 1 vit burg efektiv.
Shqiptimi i aktgjykimit dënues të Gjykatës Penale ishte publik, ku kishin mundësi ta ndjekin edhe qytetarët nga shtëpitë e tyre.
Sipas komenteve të opinionit në rrjetet sociale, thuhet që dënimi për të akuzuarit e 27 prillit është një dëshmi se drejtësia dalëngadalë po vjen në Maqedoni, ashtu siç kishte premtuar edhe kryeministri Zaev para se të merr mandatin e qeverisjes. /tesheshi.com/
