Ca vezë e domate të lëshuara paraditen e së hënës ndaj ministrit Beqaj, përçuan mesazhin se kuqezinjtë e Kreshnik Spahiut po tentojnë të huazojnë performancat e aksioneve politiko-guerrile të Vetëvendosjes në Kosovë si një formë për të qenë me patjetër në “tregun” e politikës së ditës.
Sepse historia e AK-së, është ndër më të çuditshmet e viteve të fundit. Nuk është njohur rast tjetër i ngjashëm ku një forcë politike shkon e faktorizohet me aq shpejtësi e po me aq shpejtësi ç’faktorizohet frikshëm, sa vetëm halli i madh që e ka zënë PD-në nga kuotat më të ulëta elektorale në 20 vjet, ku krijimi i aleancave të reja është bërë emergjencë politike, mundet ta mbajë akoma “në jëtë” AK-në.
Dhe për hir të së vërtetës, vetëm një gjë ka prodhuar deri më sot kjo forcë politike: shqiponjën e krijuar me kryqëzimin e gishtave të duarve, shndërrur në fenomen mbarëkombëtar, për të cilën i duhet njohur autorësia, asaj si parti e liderit, Kreshnik Spahiu.
Aleanca Kuqezi, erdhi pas një aksioni gjysëm juridik e gjysëm atdhetar të Kreshnik Spahiut si numri 2 i KLD-së, aty nga 2011 – 2012-ta, ku ai nisi të denonconte dyshtetësitë e dhëna nga gjykatat, sidomos ato jugut, ku paligjshmërisht shqiptari na ishte bërë edhe grek.
Dhe më pas, pasi arriti të kreditohej në publik si një figurë potente nëpërmjet denoncimit të kësaj paudhësie në terma nacionalë, Kreshnik Spahiu doli hapur si faktor politik ne krjimin e Aleancës Kuqezi; e cila, për vetë kushtet e krizë ku u ndodh vendi, arriti të moleps masa të mëdha njerëzish, që në të tilla raste ngushëllimin e gjejnë tek flamuri e shqiponja.
Shtoi kësaj dhe angazhimin me këtë forcë politike të një figure si Myslim Pasha, një burrë i mençur e patriot, prej së cilit u denoncua edhe profesionalisht “falja” e detit Greqiësë në paktin e famshëm detar.
Aleanca u vendos në dy fronte betejash politike: atë me Greqinë, si për t’i mbajtur të gjalla afshet nacionaliste; dhe në atë të brendshmen, ku duke denoncuar ashpërsisht Berishën (PS-ja ngjante se e përkedhelte krahasuar me AK-në, prej së cilës Berisha i “pagëzoi” si “faqezinj”), po tentonte të mblidhte rreth vetes sa më shumë të pakënaqur. Puna shkoi deri aty sa tubimet e saj të shiheshin si vlime të frikshme popullore, aq sa drejt kësaj force nisi të hidhte sytë dhe vetë Edi Rama.
Sakaq, Spahiu bëri dhe përpjekje për t’u investuar si një “Albin Kurti” i Shqipërisë, ndonëse pa asnjë lloj ngjashmërie ne tipoligji, profil dhe rrugëtim politik me ish-kreun e Vetëvendosjes. Disa ftesa përcjellë VV-së për organizime protestash të përbashkëta në Morinë, ku Spahiu skiconte veten krahpërkrah Kurtit, për të bërë të mundur rritjen e kuotave politike dhe në Kosovë, morrën gjithnjë përgjigje negative.
Rënia e AK-së, përkundër ngritjes së simbolit të saj të shqiponjës, do vinte pas një mosdakortësie të Kreshnik Spahiut dhe Edi Ramës para 23 qeshorit. Siç e ka shpjeguar ky i fundit në një emision tek Fevzoja, Spahiu i kishte kërkuar që të përfshinte në listat e PS-së 4 emra nga AK-ja, por që Rama e kishte parë këtë si një skemë të papranueshme, edhe nga mënyra se si po ja kërkonte këtë nder paraelektoral kreu i Kuqezinjve.
Zgjedhjet erdhën. Aleanca konkuroi e vetme, dhe deri më sot, nga dy palë zgjedhje, të përgjithshmë dhe lokale, nuk kanë mundur të marrin asgjë. Nuk kanë as ndonjë deputet e as ndonjë këshilltar bashkiak gjetiu.
Mëgjithatë, përpjekjet e Kreshnik Spahiut për të mbetur faktor në politikë, nuk kanë të ndaluar. Kjo falë dhe metodave që promovon VV-ja, ku atentaton me vezë qeveritarë që i shenjëstron si të korruptuar, e që ndoshta mund të vlejnë për të, por jo për AK-në e cila po shihet si dita-ditës si “Eduart Ndocaj Group” në makthin që të shkakton politika.
P.S. Pas shqiponjës në gjoks, në dekorin e saj politiko-nacionalist ka shtuar dhe plisin e bardhë, si dhe lëshimin e fishekzjarreve më ngjyrë të kuqërremtë, por duket se këto detaje e kanë bërë akoma dhe më shumë estradeske. /tesheshi.com/
