“A ka edhe më tej përgjime?” Kjo ishte pyetje që u parashtrua dje në komisionin parlamentar, ku u shqyrtua Raporti për mbikëqyrjen e punës së agjencisë së inteligjencës dhe të shërbimeve tjera sekrete. Sipas njërit prej anëtarëve të komisionit nga Lidhja Demokratike, Pavle Trajanov, ka dyshime se edhe më tutje po keqpërdoren sistemet e përgjimeve nga shërbimet e sigurisë.
“Ka pohime se edhe më tej këto sisteme po keqpërdoren. Është e mundur që parti të caktuara politike, të cilat janë të fuqishme dhe të forta e që të mund të lidhen me sistemet e shërbimeve të sigurisë dhe madje nga lokacionet tjera, përsëri t’i përdorin këto sisteme për grumbullimin e informacioneve lidhur me ngjarjet politike”, tha Pavle Trajanov, LD.
Ndërkaq, sipas partisë maqedonase në pushtet nevojitet bashkëpunim mbipartiak në pjesën e mbikëqyrjes së shërbimeve të sigurisë, në mënyrë që të shtohet besimi.
”Kemi problem me nivelin e ulët të besimit, që ekziston mes deputetëve, anëtarë në këto komisione, gjithashtu me nivelin e ulët të bashkëpunimit, kur bëhet fjalë për fushën e mbikëqyrjes”, tha Pavle Sazdov VMRO-DPMNE./tesheshi.com/
