Nga Mensur Krasniqi
A po përçahet Bashkimi Demokratik për Integrim? Kjo është pyetja dhe temë kryesore që flitet në opinion tashmë disa muaj me rradhë. E gjithë kjo thuhet se vjen pas aferës korruptive me Maxhar Telekom, në të cilën pretendohet se janë të përfshirë kryetari i Partisë Ali Ahmeti dhe zëvendëskryeministri Musa Xhaferri. Si arsye tjetër për shpartallimin e funksionarëve të lartë të BDI-së, sipas deputetit të kësaj partie Zylfi Adili, thuhet të jetë dështimi i reformave brendapartiake. Andaj deputeti Adili ka konfirmuar largimin e tij nga partia dhe formimin e një subjekti të ri i cili do të quhet “UNITETI”.
“Figura të cilët duhet të pranojnë reforma brenda subjektit politik të BDI, shihet qartë që nuk duan ta bëjnë këtë punë, kështu që ne jemi të detyruar që të nisim me iniciativën”. Deputeti Zylfi Adili deklaron se në iniciativën e re të gjithë anëtarët e BDI dhe të qytetarët tjerë të cilët ndihen njerëz të pastër, të pa-korruptuar, pa hipoteka dhe, që kanë guxim dhe që duan t’i çojnë përpara proceset e ngelura i kanë dyert e hapura të bashkëngjiten.
Edhe përkundër spekulimeve që kësaj iniciative për formimin e një subjekti të ri politik do ti bashkangjiten figura nga krahu i luftës në BDI, si Hazbi Lika, Fatmir Dehari, Rafiz Haliti e Gëzim Ostreni, këtë fakt nuk e konfirmoi deputeti Zylfi Adili. Mirëpo ai shtoi se UNITETI do të ketë për qëllimbashkimin e të gjitha subjekteve tjera opozitare.
“Ideja apo tendenca e krijimit të këtij subjekti politik është që ne të bashkëpunojmë me të gjitha subjektet politike që llogariten si subjekte të vogla, duke përfshirë këtu BESËN lëvizjen e Ziadinit, RDK-në dhe të gjitha OJQ-të të cilat kanë qëndrime dhe qëllime për të bërë reforma rrënjësore në shtet.”, ka shtuar Adili.
Për portalin tesheshi.com mbi iniciativën e themelimit të një partie të re nga funksionarë të pakënaqur të BDI-së, dhe mbi arsyet e përçarjes brendapartiake foli analisti i njohur shqiptar Mersel Bilalli. Sipas tij, përçarja brendapartiake vjen si pasojë e uzurpimit të partisë apo privatizimit të partisë nga dy tre persona të cilët nuk i kanë pranuar reformat, por reformat i kanë marrë si sulm ndaj tyre.
“Bëhet fjalë për një strukturë gjatë kohë të koruptuar dhe përfshirë në afera të ndryshme e cila devalvon, pra mere subjektin politik luftën por edhe dinjitetin, meqë sadokudo ajo parti është ndërtuar mbi gjakun e ndokujt, duhet bërë dallim këtu. Nuk guxon askush të marrë si sulm propozimet e tjerve për reforma partiake”, deklaroi analisti politik, Mersel Bilalli për tesheshi.com.
Analisi Mersel Bilalli shprehet tejet optimist mbi suksesin e kësaj iniciative meqë siç thotë ai nuk i përket grupit që mendojnë se s’bëhet gjë nga funksionarë që burojnë nga partia korruptive, por e kundërta këta që po tërhiqen sinqerisht e kanë kuptuar që lumturia mund të jetë vetëm e përbashkët.
“Mendoj se është tejet pozitive që po ndodh kjo, sepse së paku do ti shkurton ato vuajtjet tona, meqë suksesi më i madh politik i BDI-së është shpërngulja e shqiptarëve në vendet perëndimore dhe inferioriteti tyre ndaj VMRO-DPMNE-së. Unë jam shumë i sigurt se do të kenë sukses me iniciativën e tyre, meqë nuk i përkas asaj grupe që thonë se “edhe këta janë të njëjtë sepse burojnë nga ajo parti”, por mendoj se bëhet fjalë për persona që kanë kuptuar se lumturia mundet të jetë vetëm e përbashkët, dhe idealin e kanë mbi atë personale. Jam i mendimit se ky kod mental është në drejtim të konstruktivitetit dhe do të ndihmon në bashkimin e opozitës dhe definitivisht kjo strukturë e BDI-së të shkon në histori” përfundoi Bilalli.
Tashmë është e njohur se mosrespektimi i procedurave brenda partiake dhe dështimet në politikat qeverisëse kanë rezultuar me dorëheqje brenda Bashkimit Demokratik për Integrim. Para disa muajve u tërhoq zëvendës ministri i mbrojtjes Arben Llabenishti. Dorëheqjen e tij kishte paraqitur edhe sekretari organizativ i partisë, Hazbi Lika dhe nënkryetari i degës partiake në Haraçinë Shefik Duraki. Ish zëvendës ministri i mbrojtjes, Arben Llabenishti, i cili deri dje ishte edhe kandidat për kryetar dege në Strugë në arsyetimin e dorëheqjes ka drejtuar akuza të shumta ndaj strukturave të caktuara duke i etiketuar demagogë, arrivistë, gllabërues, servilë dhe tradhtar.
Se a do të shtohet numri i funksionarëve të pakënaqur në BDI, dhe mos vallë do të ndahet në dysh kjo parti, këtë më së miri do ta rrëfen koha. /tesheshi.com/
