Zyrtarët në Kinë kanë raportuar numrin më të madh të rasteve ditore të COVID-19 në dhjetë muajt e fundit dhe për shkak të situatës së vështirë epidemiologjike në verilindje të vendit, më shumë se 28 milion njerëz janë në karantinë.
Një total prej 144 rastesh të reja me COVID-19 u raportuan në Kinë të enjten, tha Komisioni Kombëtar i Shëndetësisë në një deklaratë, numri më i lartë ditor që nga 202 raste të regjistruar në 1 mars të vitit të kaluar, raportoi Reuters.
Komisioni shtetëror tha se kishte 135 raste të reja të infeksioneve lokale, 90 prej të cilave ishin në provincën Hubei pranë Pekinit, e cila u godit më shumë në valën e fundit.
43 raste të tjera u raportuan në provincën verilindore të Heilongjiang, dhe një rast i ri i konfirmuar u raportua nga provincat Guangxi dhe Shaanxi.
Numri i përgjithshëm i rasteve të konfirmuara COVID-19 në Kinë është tani 87,988, ndërsa numri i vdekjeve është i pandryshuar – 4,635.
Kjo valë e re COVID po ndodh në momentin kur një ekip i studiuesve të Organizatës Botërore të Shëndetësisë (OBSH) mbërritën në Kinë, për të përcaktuar origjinën e pandemisë që ka vrarë pothuajse dy milion njerëz në të gjithë botën deri më tani.
Delegacioni i OBSH-së, i cili mbërriti vonë për shkak të refuzimit të Pekinit për t’i lejuar ata të hynin në vend, gjithashtu u ndesh me një problem dje, pasi dy anëtarë të ekipit u ndaluan në Singapor pasi testet treguan se kishin antitrupa, ndërsa pjesa tjetër e delegacionit ishte në karantinë në Wuhan, ku do të qëndrojë për dy javë, pas së cilës do të fillojnë hulumtimet.
Frika nga Viti i Ri Kinez
Numri i përgjithshëm i rasteve COVID-19 është ende nën atë që Kina kishte në kulmin e pandemisë në fillim të vitit 2020, por shqetësimet në lidhje me një valë të re në të gjithë vendin po rriten ndërsa festimet e Vitit të Ri Kinez afrohen, kur pritet më shumë udhëtime gjatë pushimet, ndaj dhe qeveria i bën thirrje popullsisë të qëndrojë në shtëpi. /tesheshi.com/
