Udhëheqësi turk qipriot Ersin Tatar tha se lufta në Ukrainë e cila ka tronditur komunitetin ndërkombëtar, por dëshmon se historia përsëritet dhe se askush nuk mund të garantojë që një luftë në Qipro si ajo e vitit 1974 nuk do të përsëritet.
Ai tha gjithashtu se nuk bëhet fjalë për njohje të Republikës së Qipros nga Turqia, ndërsa përsëriti strategjinë e “dy shteteve dhe popujve të veçantë” në ishull. Ai tha se që nga zgjedhja e tij kishte thënë se federata nuk diskutohet më dhe se në dialog presin diskutimin e dy shteteve të veçanta dhe strukturës së tyre.
Tatar tha se Këshilli i Sigurimit i OKB-së duhet të marrë një vendim dhe të njohë barazinë sovrane dhe statusin ndërkombëtar të turqve qipriotë. Ai pretendoi se turqit qipriotë u dëbuan nga Republika e Qipros me forcën e armëve në vitin 1960 dhe se të gjithë i dinin qëllimet e grekëve qipriotë dhe të Greqisë.
Ai foli për dallime të mëdha në mënyrën se si dy komunitetet e perceptojnë kuptimin e federatës dhe se grekët qipriotë duan një shtet të bashkuar, heqjen e ndikimit të Turqisë dhe zero ushtri.
Ai përsëriti se një marrëveshje në Qipro mund të ekzistojë vetëm mbi bazën e dy shteteve të veçanta që jetojnë krah për krah.
I pyetur për të komentuar një deklaratë të të dërguarit të posaçëm të OKB-së Kolin Stjuart mbi ndihmën financiare për turqit qipriotë, Tatar tha se Kombet e Bashkuara po përpiqeshin të gjenin gjuhën e përbashkët në mirëbesim për të kryer detyrat e veta. Ai shtoi se nëse ka marrëveshje, atëherë gjëja e parë që duhet reduktuar është pabarazia ekonomike.
Sa i përket energjisë, ai tha se e vetmja mundësi për Qipron është të bashkohet me pjesën tjetër të Evropës përmes Turqisë dhe kjo do të ishte mënyra e vërtetë e ndërtimit të besimit. /tesheshi.com/
