Nga Musa Mustafa
“Nuk duhet të kënaqemi vetëm me tërheqjen e eshtrave nga varrezat masive të shqiptarëve në Serbi, por duhet të punojmë që të dimë se çfarë në realitet ka ndodh me këta shqiptarë të vrarë”
Këtë koment ka bërë Latif Mehmeti nga Shoqata e Familjarëve të Personave të Zhdukur dhe Viktimave të luftës, “Përkorë” në Podujevë. Shqetësim të njëjtë ka shprehur edhe Bajram Qerkinaj nga Shoqata për Persona të Zhdukur në Mitrovicë, “Zëri i Prindërve”.
“Fëmijët tanë që janë kidnapuar nga forcat ushtarako policore dhe paramilitare serbe gjatë luftës në Kosovë para viti 1998-1999, dyshohet se përveç që janë vrarë, me trupat e tyre është abuzuar nëpër spitalet e Kosovës dhe Beogradit, e më pas janë varrosur në varrezat masive anekënd Kosovës dhe Serbisë, kryesisht në poligonin e policisë serbe në Batajnicë të Beogradit”, ka thënë Latif Mehmeti.
Dhe si provë për këtë, Latifi përcjell dëshminë e një nëne, djali i së cilës, Safet Gashi, 10-vjeçar nga fshati Dobërdol i Podujevës, është marrë nga forcat ushtarako policore serbe e çuar në spitalin e Prishtinës gjatë luftës në Kosovë.
Elhemja rrëfen:
“Fillimi i bombardimeve të NATO-së, mua dhe Safetin na kanë zënë në Spitalin Infektiv në Prishtinë, pasi që Sefeti patë një grip. Ishin ditë shumë të vështira pasi që i tërë spitali u mbush me ushtarë e policë serbë dhe natën e kalonim në bodrum. Safeti u shërua, por ne nuk kishim mundësi të dilnim nga apitali pasi që çdo komunikim me familjen më kishte humbur”. Diku rreth 9-10 majit të vitit 1999, një mjek serbë dhe një motër medicinale që e quanin Ruzha, erdhën dhe më thanë se unë duhet të largohesha nga spitali pasi që djali (Safeti 10 vjeç) është shëruar, por një gjë e tillë ishte e pa munduar pasi që nuk kisha ku të shkojë. Më 12 maj, në dhomën ku ishte Safeti i shtrirë kanë ardhur tre policë serbë dhe më kanë thënë se djalin duhet ta marrim me ja bë do analiza. E morrën dhe më nuk e kthyen kurrë”, rrëfen tmerrin e asaj dite Elhemja, duke shtuar më tej:
“Më kot prita, por djalin nuk e kthyen. Pa ndërprerë kam pyetur motrat (infermieret – sqarim i redaksië), se ku e kam djalin, por përgjigje nuk kishte. Më 15 maj, motra medicinale serbe, Ruzha më komunikoi se djali ka vdekur duke mos më dhënë asnjë sqarim, por edhe unë gjuhën serbe nuk e kuptoja. Isha e humbur dhe e shkatërruar nga mërzia më nuk kisha çka të kërkoj aty. Ika nga spitali dhe kufomën e djalit e gjeta pas 4 vitesh në varrezën masive në Dragodan në Prishtinë. Nuk di si më vdiq djali. E di se djali gëzonte shëndet të mirë, por si e mbyten e çka bënë veç Zoti dhe ata që ma morën e dinë”, ka thënë Elhemja e ulur në oborrin e shtëpisë së saj në Dobërdol, duke lëshuar ofshamën e nënës nga dhimbja për të birin.
Si duket, fatin e Safetit e kanë përjetuar edhe shumë fëmijë të tjerë kosovarë, ku për 102 prej tyre nuk dihet ende asgjë.
“Vetëm në varrezat masive në Serbi janë identifikuar 122 fëmijë. Për shumicën prej tyre, në certifikatën e vdekjes shkruhet se nuk iu dihet shkaku i vdekjes”, ka thënë shefi i “Përkorë”-s, Latif Mehmeti.
Sipas tij, shumë familjarë dyshojnë se fëmijët e tyre janë kontrabanduar në Serbi dhe më pas janë vrarë.
“Edhe unë dyshoj se me fëmijët tanë është abuzuar nga mjekët serbe, ose iu është marrë i tërë gjaku ose iu janë marrë dhe organet me qëllim të trafikimit të tyre”, ka thënë Mehmeti dhe ka shtuar se për këtë, institucionet e Kosovës, pra ato qendrore duhet ta ngrenë zërin, por edhe Komisioni Shtetërore për Persona e Pagjetur duhet të punojnë më shumë në këtë drejtim.
Në anën tjetër, Bajram Qerkinaj, anëtari i Komisionit Shtetëror për Persona të Zhdukur e të Pagjetur, dhe udhëheqës i shoqatës ”Zëri i Prindërve”, i ka thënë portalit tesheshi.com se ka dëshmi se gjatë zbulimit të kufomave në varrezën masive në Batajnicë të Beogradit është vërejtur se në disa prej tyre ka pasur të vendosur numra të spitalit.
“Pra, çka iu deshën kufomat e shqiptarëve të vrarë në spitalet e Beogradit?!”, ka thënë Qerkijan dhe ka shtuar se dyshohet se me kufomat e shqiptarëve është abuzuar nga ana e serbëve. “Përndryshe, shton ai, serbët duhet të japin llogari se për cilat sëmundje shqiptarë që janë gjetur të varrosur në varrezën masive në Batajnicë, kanë qëndruar në spital në Beograd?”. /tesheshi.com/
