A ka Rusia një kryekomandant ushtarak përgjegjës për luftën në Ukrainë? Kjo është një pyetje që zyrtarët aktualë dhe ish-zyrtarët e mbrojtjes amerikane janë përpjekur ta përcaktojnë. Ata besojnë se pikërisht kjo ka kontribuar në mungesën e organizimit të sulmeve ruse, shkruan CNN.
Zyrtarët e mbrojtjes amerikane besojnë se trupat ruse po dështojnë të koordinohen dhe duket se po veprojnë pa një plan operacional gjithëpërfshirës. Përveç kësaj, ata vënë në dukje si problem shtesë komunikimin e dobët.
“Komanda e unifikuar është një nga themelet e luftës,” tha analisti ushtarak, gjenerali në pension Mark Hertling. “Dikush duhet të jetë në krye, të koordinojë sulmet, të merret me logjistikën, të angazhojë forcat rezervë, të analizojë sukseset dhe dështimet e operacioneve dhe të rregullojë veprimet në përputhje me rrethanat,” shtoi ai.
Ministria ruse deri më tani nuk e ka përmendur komandantin e përgjithshëm.
Ish-gjenerali i ushtrisë amerikane David Petraeus tha për CNN se gjeneralët ushtarakë rrallë vriten në luftëra. Duhet përmendur se ukrainasit thonë se deri më tani kanë vrarë pesë gjeneralë rusë.
Hertling, nga ana tjetër, vëren se shkalla e pushtimit vetëm sa e përkeqësoi situatën. Sipas tij, koordinimi i një veprimi të tillë kërkon “aftësi të gjera komunikimi, komandim, kontroll dhe shërbime inteligjente që rusët thjesht nuk i kanë”.
“Unë nuk shoh se ajo që po bën marina është në përputhje me forcat ajrore apo ndonjë gjë që ata bëjnë në tokë,” tha gjenerali në pension Ben Hodges. “Rusët kanë vështirësi të mëdha me komandimin dhe kontrollin gjatë këtij operacioni,” përsëriti një burim amerikan i njohur me situatën në terren. “Disa nga kjo mund të jetë për shkak të veprimeve të vetë ukrainasve,” shtoi ai.
Burime të paidentifikuara i thanë CNN se trupat ruse shpesh shkëputeshin nga komandantët e tyre.
“Ushtarët rusë në terren kanë një qëllim, por jo një mënyrë për të raportuar nëse diçka nuk shkon”, shtoi burimi, i cili është i njohur me shërbimet e inteligjencës. /tesheshi.com/
