Pjesa më e madhe e mediave në Rusi është nën kontrollin e shtetit, gjë që shpjegon pse kanalet televizive në atë vend e paraqesin pushtimin si një akt vetëmbrojtjeje që synon ekskluzivisht largimin e ushtrisë ukrainase, shkruan BBC.
Shumë kanale citojnë një deklaratë të Ministrisë së Mbrojtjes, e cila thotë se “armë me precizion të lartë” përdoren kundër vendndodhjeve ushtarake ukrainase, pa kërcënuar civilët.
Televizioni zyrtar shtetëror Rossiya 1 e filloi programin e tij të lajmeve me fjalët: “Rusia nisi sot një operacion special ushtarak që synon mbrojtjen e njerëzve që janë ekspozuar ndaj abuzimit dhe gjenocidit të regjimit në Kiev për tetë vitet e fundit”.
Ndërkohë, disa lajme përfshinin sondazhe dhe intervista në rajonet e kontrolluara nga rebelët në Ukrainën lindore me vendasit në dukje të gëzuar.
Kanali zyrtar shtetëror i lajmeve Rossiya 24 tregoi dy persona në Donetsk duke biseduar me një gazetar.
“Është madhështore. Nuk ka fjalë të tjera për ta përshkruar,” tha një burrë.
“Jam vërtet e lumtur. Ne e kemi pritur këtë për tetë vjet,” tha një grua për kanalin. /tesheshi.com/
