Ekziston një bindje që ca të këqija shqiptare i përkasin vetëm viteve të fundit; më saktë 5 viteve të Ramës në pushtet, ku përfshihen droga, krimi, korrupsioni, apo dhe shfaqjet enveriste në raste përkujtimoresh. Por a është kjo bindje një investim i rrjeteve sociale? Pra, a janë këto të fundit që thjesht i kanë majisur këto të këqija tipike tranzicioni? Mundet. Të gjithë e pohojnë, edhe mendimi sociologjik, se rrjetet e kanë transformuar komunkimin, deri dhe njeriun, mënyrën se si gjykon e percepton. Dhe sigurisht jo për mirë.
Duke qëndruar në rastin shqiptar, është e pamohueshme se rrjetet sociale kanë ndikuar deri në psikoza kolektive, siç është ajo e “ikjes”, apo e bindjes se “ky vend nuk bëhet”, ku gjithë ajo masë njerëzore që e ka disfatizmin dhe negativitetin mënyrë të menduari, deri dje pa hapësirë e armë, tashmë i janë dhënë të dyja.
Dhe në gjykimin mbi realitetin, është kjo masë që vendos tashmë.
Për të qenë më konkret, një pjesë e drogës, krimit, korrupsionit e lloj-lloj mizerjeve të tjera shoqërore, janë deri diku dhe fabrikime të dëshpërimit që derdhet në rrjete sociale. Kjo e ndihur dhe nga një qeverisje pa tregues konkret e të prekshëm në të gjitha sa u tha më lart. Por nuk mund të thuhet se janë të gjitha produkte të qeverisjes aktuale.
Te e djeshmja, kjo e keqe konstante, thjesht ka qenë e paekspozuar në rrjete sociale, dhe e mbuluar më pas nga një situatë krejt tjetër ekonomike. Më saktë, një periudhë me më shumë para, jo si pasojë e ndonjë ekonomie të fortë strukturore, por nga burimet e emigracionit, nga Lazarati apo dhe nga ca pastrime parash në ndërtim, të cilat bënë që për shkak të “xhepit plot”, shoqërisë të mos i bënte përshtypje as droga që ishte sheshit, as krimi e korrupsioni po ashtu sheshit, as “ikjet”, e madje as veteranët me fotot e Enverit në përkujtimoret e luftës.
Rama deri më tani nuk ka shkëlqyer, por nuk mund të mohohet dhe se po qeveris në “kohën e gabuar”.
Dhe sa për ilustrim të asaj, që dhe dje, droga ishte diçka krejt familjare në jetët tona, po ju sjellim një numër humori nga Portokallia e vitit 2006, një vit pas ardhjes së Berishës në pushtet. Dhe si çdo humor që pasqyron kohën kur lind, edhe ai ishte krejt i natyrshëm në këtë pikë.
Por imagjonini se nëse ajo pjesë e luajtur atëherë, me atë fabul, do luhej sot e shpërndahej në rrjete sociale, do vlente sa 100 konferenca shtypi denoncuese të opozitës, me kokainë e kanabis. /tesheshi.com/
Ndiqeni:
