Nga Gjergji Koja
Ish-kryeministri Sali Berisha, pas një heshtjeje të gjatë, vendosi t´i numërojë të gjitha kritikat apo dështimet Lulzim Bashës, që rritjen në karrierën politike, veç të tjerave ia ka si detyrim liderit historik të PD-s♪7.
Në një intervistë, Berisha nuk nguroi të kritikonte listën e kandidatëve për deputet, që e quajti të Bashës dhe jo të PD-së, përsa kohë ajo nuk kishte kaluar në forumet e partisë. Dhe në këtë prizëm, ai bëri një paralajmërim të qartë: kjo që ndodhi nuk duhet të përsëritet më.
Po kush e mban mend natën kur caktoheshin kandidatët për deputet, do të kujtojë edhe vizitën pothuajse afër mesnatës që Lulzim Basha bëri në godinën ku veç të tjerash ka zyrën edhe Berisha.
Një tjetër kritikë Berisha e kishte për mënyrën se si Basha u soll gjatë fushatës elektorale, duke mos arritur të mbrojë marrëveshjen me Ramën, për të cilën tha se ishte shumë e mirë dhe një fitore për PD-në. Por, sipas Berishës, Basha nuk diti të marrë frytet prej saj, gjë që Rama e shfrytëzoi më së miri.
Berisha konsideroi si mizerabël këshilltarët e Bashës, duke ngritur shumë pikëpyetje se cilët janë ata. Nuk artikuloi emra, por ky ishte paralajmërimi ndoshta më i fortë që i bëhet kreut demokrat.
Po cilët janë këshilltarët që Lulzim Basha pati në fushatë?
Nëse i ndajmë në dy kategori, ato janë të huajt dhe bashkëpunëtorët më të ngushtë, apo ata që quhen si stafi më i besuar në PD, një pjesë e të cilëve sot janë deputetë.
PD gjatë fushatës elektorale kontaktoi një kompani amerikane, e cila e ka këshilluar mbi mënyrën se si kjo parti do të organizohej, ndërsa do të lobohej paralelisht në qarqet politike në SHBA për të siguruar mbështetjen e nevojshme në administratën Trump për kreun demokrat, që para 25 qershorit ishte kandidati për kryeministër nga opozita.
Marrëveshja me amerikanët e “Stonington Strategies,” pjesë e “Muzin Capitol Partners”, e regjistruar në Maryland të SHBA-ve, u nënshkrua në muajin mars të 2017-ës, kohë kur demokratët ishin në protestë.
Sipas të dhënave të deklaruara nga “Muzin Capital Partners LLC” në Departamentin e Drejtësisë në SHBA, qëllimi i kësaj kontrate ishte “projektimi dhe implementimi” i fushatës së Partisë Demokratike për zgjedhjet parlamentare; promovimi i qëllimeve të Partisë Demokratike në media dhe pranë bizneseve dhe figurave politike në SHBA.
Gjithashtu, “Muzin Capital” raportonte se do të ndihmojë Partinë Demokratike në krijimin e një lëvizjeje konservatore në Shqipëri.
Muzin Capitol Partners LLC është një kompani e themeluar nga Nicolas Muzin, një këshilltar strategjik dhe zëvendës-shef shtabi për senatorin Republikan Ted Cruz gjatë fushatës së tij për President në vitin 2016. I trajnuar si mjek dhe jurist, Nick Muzin ka punuar gjithashtu si shef stafi i senatorit Tim Scott, kur ky i fundit ishte në pozicionin e kongresmenit.
Ndërkohë, gjatë fushatës, Lulzim Basha prezantoi edhe këshilltarë gjermanë, pjesë e partisë së kancelares Angela Merkel, që do të asistonin fushatën dhe më konkretisht do të ndihmonin PD në programin e saj.
Basha deklaronte se programi që kishin demokratët ishte çertifikuar nga gjermanët e kancelares Merkel.
Ai që u shfaq në disa takime të PD-së ishte Hans Joachim Falenski, konsulent ekonomik, i grupit parlamentar prej 310 deputetësh të partisë së Merkel.
Hans Joachim Falenski në bashkëpunim me fondacionin “Konrad Adenauer” që është një fondacion pranë CDU ka përgatitur programin e PD-së.
Referuar të dhënave, Falenski është një referent për cçështjet e politikës së jashtme në grupin e CDU-së, por krahas tij janë edhe 49 të tjerë.
Por, në grupin e këshilltarëve të brendshëm, pra shqiptarë, mund të përfshihen të gjithë bashkëpunëtorët e afërt të Lulzim Bashës, që nga kabineti i tij, sekretariati apo disa emra të tjerë, që konsiderohen si “eminenca gri”, pasi nuk kanë asnjë rol drejtues në PD, por kanë akses në takimet apo dhënien e këshillave për kreun demokrat.
Ky grup, ndoshta mund të përbëjë edhe shqetësimin kryesor në PD, pasi kurrë nuk shfaqen publikisht, por për shkak të pozicioneve dhe lidhjeve të tyre, brenda dhe jashtë vendit, mund të ndikojnë në vendimmarrjet kyçe të kësaj partie.
Thuhet se janë njerëz me influencë qoftë në media, ekonomi dhe çështje të tjera, por kurrë nuk jepen emra, edhe pse nuk është vështirë t’i gjesh.
Pra, nëse do t’i referohemi akuzës së Berishës mbi këshilltarët, gishti mund të drejtohet mbi cilindo nga SHBA deri në Shqipëri, përderisa ai nuk përmendi emra konkretë.
Gjithsesi në një tjetër këndvështrim, ndoshta ky është një paralajmërim i qartë se Lulzim Basha mund të këshillohet me cilindo, por jo pa u konsultuar në fund me mentorin politik, që në rastin konkret është Sali Berisha. /tesheshi.com/
