Foto të rralla nga lufta e dytë botërore që tregojnë politikanët grekë, klerin e Kishës Greke dhe komandantë të ushtrisë greke me oficerët nazistë të ushtrisë Gjermane vijnë për herë të parë të botuara për publikun shqiptar nga gazetari Arben Lalla në librin “KOLABORACIONI DHE GENOCIDI NË ÇAMËRI/ 1944-1945”, promovuar sot nga UET-Press.
Popullsia çame në Greqi u masakrua dhe u zbua nga shtëpitë e veta gjatë luftës së dytë botërore nga ushtria greke. Argumenti kryesor ishte se popullsia çame bashkëpunoi me forcat pushtuese naziste. Por e vërteta është krejt e kundërta dhe këtë na e sjellin fotot.
Studiuesi Llalla mbron argumentin se çamët u shpërngulën për t’iu sekustruar pronat, të cilat dhe sot e kësaj dite nuk arrijnë t’i marrin trashëgimtarët që jetojnë në Shqipëri.
Libri, i cili bazohet kryesisht mbi foto, botohet në prag të përkujtimit të masakrës mbi popullsinë çame më datë 27 qershor.
“Dhuna e shtetit grek për t’i përzënë shqiptarët nga Çamëri nuk u ndal, ajo u bë me mënyra të tjera duke ju sekuestruar pronat, rrahje, burgosje dhe vrasje. Për të ardhur në vitin 1944-1945, në përzënien me force dhe masakra kolektive nga forcat ushtarake të udhëhequr nga gjenerali Napoleon Zerva me direktivat e drejtuesve të lartë të Kishës Autoqefale të Greqisë.
Masakrat dhe përzënia kolektive e viteve 1944-1945, u bë me pretekstin se shqiptarët në Çamëri ishin bashkëpunëtorë të gjermanëve, një akuzë që nuk u vërtetua asnjëherë. Do të sjellim fakte të pamohueshme se kryepeshkopët dhe mitropolitët e Kishës Autoqefale të Greqisë janë skenaristët dhe pjesëmarrësit direkt të genocidit grek kundër shqiptarëve mysliman në Çamëri.
Me anë të fotografive të viteve 1944-1945, ne do të vërtetojmë se Kryepeshkopi Serafeim dhe Mitropoliti Dhorotheos, kanë qenë pjesëmarrës në masakrën e 27 Qershorit 1944, në Paramithi me uniformë ushtarake të ushtrisë së Zervës, EDES. Do sjellim të dhëna se kryeministrat, ministrat dhe deputetë të Greqisë të pas viteve 1980, rridhnin nga familje që kishin qenë bashkëpunëtorë të gjermanëve dhe pas vitit 1945, këta bashkëpunëtorë nuk u dënuan, as u internuan, as ju mor pasuria ashtu siç ndodhi me shqiptarët myslimanë të Çamërisë.
Pikërisht qëllimi i këtij libri është për të sjellë dokumente të asaj kohe që çamët nuk kanë bashkëpunuar asnjëherë kolektivisht me italianët dhe gjermanët. Ka patur individë që kanë bashkëpunuar me këta pushtues, por nuk mund të masakrohet një popull i tërë për individë të cilët edhe në të shkuarën i kanë shërbyer pushtuesve të ndryshëm për të ruajtur pasurinë dhe privilegjet.
Ne, do të sjellim fakte se djemtë e Çamërisë ishin përkrah ushtrisë partizane greke EAM-ELAS. Do sjellim të vërtetën se kush janë ata që bashkëpunuan zyrtarisht me pushtuesit italian dhe gjerman. Këto fakte ne i kemi nxjerrë nga arkivat greke, 90% e bibliografisë sonë do të mbështetet tek gazetat, revistat dhe librat e autorëve grek.
Duke thënë dhe mbrojtur të vërtetën, atë të vërtetë që duhet ta themi të gjithë bashkë, grek e shqiptar nëse duam një fqinjësi të mirë, nëse duam një të ardhme paqësore.”- shkruan Llalla në hyrje të librit të tij.
Sipas këtij studimi edhe ato foto që janë përdorur si argument për bashkëpunimin e çamëve me nazistët janë jo të vërteta, pasi në foto janë myslimanë të Bosnjës ose shqiptarë të ish-Jugosllavisë, por jo çamë.
“Është për të ardhur keq kur lexon librat e historianëve, studiuesve dhe publicistëve grek që i ofrojnë lexuesve materiale të falsifikuara nga ata vetë. Çdo historian apo studiues grek që është marrë me çështjen e shqiptarëve të Çamërisë për vitet 1941-1944, për të vërtetuar akuzat që Greqia ka ngritur ndër vite se çamët kanë qenë bashkëpunëtor të italianëve dhe gjermanëve i shoqërojnë librat apo shkrimet e tyre me fotografi ku shihen myslimanët e Bosnjës me veshje gjermane SS, ku shihen shqiptarët në ish-Jugosllavi në shoqëri me oficerët italianë dhe gjermanë apo me veshje SS. Këta shkrues të mjerë i kanë ofruar opinionit të gjerë grek shkrime jo shkencore, të kufizuara, duke bërë shtrembërime primitive”- shkruan Llalla.
/tesheshi.com/
