Kur u largua nga Shqipëria për të studiuar në Hollandë ishte vetëm 17 vjeç, ndërsa rikthimin në Tiranë, jo për pushime, por për t´u angazhuar në politikën shqiptare e ka bërë pas më shumë se 13 vitesh.
Lulzim Basha ka rrëfyer në “Opinion” se nuk është penduar për rikthimin në Shqipëri, pasi siç pohon vetë mbi të gjitha është shqiptar.
Sot ai është kryetar i PD-së, në një mandat të dytë në krye të kësaj partie, e cila për më shumë se dy dekada ishte nën kontrollin e plotë të Sali Berishës.
Shumë pak vetë mund ta mendonin që në 2005-ën, djaloshi që i buzëqeshte gjithkujt në selinë e PD-së do të kishte një karrierë të suksesshme në politikën shqiptare, kuptohet me mbështetjen absolute të ish-kryeministrit Berisha.
Në 6 vjet, drejtoi 3 ministritë më të rëndësishme të shtetit shqiptar, të Transporteve, të Jashtmen dhe të Brendshmen. Për 4 vite ishte në krye të Bashkisë së Tiranës, dhe më pas zgjidhet kryetar i PD-së, partisë më të madhe në opozitë.
“Sfida e parë ishte në moshën 17-vjeçare dhe vendi i parë që pashë përveç Shqipërisë ishte Holanda, në vitin 1991. Nuk jam penduar asnjëherë që u ktheva. Unë jam shqiptar, nuk kam lindur në Alaskë”, tha Basha. /tesheshi.com/
