Virusi i quajtur “Zika”përveç që është përhapur shumë në Amerikën Latine dhe Qendrore, tashme është përhapur edhe në disa vende të Evropës. Ky virus që shkakton probleme të ndryshme shëndetësore, me theks të veçantë tek fetuset. “Zika” ka lidhje me defekte në lindje, të njohura si mikrocefali, kur foshnjat lindin me koka jonormale, konkretisht më të vogla.
Kjo gjë ka shqetësuar edhe qytetarët e Kosovës. Mirëpo institucionet shëndetësore kanë deklaruar se në Kosovë nuk ka nivel të lartë të rreziku, ndërsa kanë shprehur gatishmërinë për t’u përballur me këtë virus.
Zyrtarë të Ministrisë së Shëndetësisë dhe drejtuesit e Institutit Kombëtar të Shëndetit Publik të Kosovës kanë deklaruar se Kosova nuk është e rrezikuar nga ky virus, ndonëse i paralajmërojnë qytetarët që t’u shmangen udhëtimeve ku virusi është i pranishëm.
Ndërkaq, Organizata Botërore e Shëndetësisë ka dhënë rekomandime që të ngritët niveli më i lartë në sistemin e mbikëqyrjes së sëmundjeve ngjitëse, përfshirë edhe këtë virus, dhe të japin informacione të sakta, me kohë, për personat që planifikojnë të udhëtojnë tek vendet ku është shfaqur virusi “Zika”.
Ministria e Shëndetësisë: Në Kosovë nuk ka nivel të lartë të rrezikut
Faik Hoti, drejtor i departamentit për informim në Ministrinë e Shëndetësisë, ka thënë për tesheshi.com se pas përhapjes së virusit “Zika” në më shumë se 23 shtete të botës dhe prekjen prej tij të rreth 4 milionë njerëzve në vende të ndryshme të botës, Organizata Botërore e Shëndetësisë ka ngritur nivelin e alarmit, sidomos për zonat që mund të kenë raste të tilla.
“Sipas, vlerësimeve që ka dhënë Instituti Kombëtar i Shëndetësisë Publike i Kosovës, Kosova për aktualisht nuk është e rrezikuar nga ky virus, ndonëse qytetarëve nuk u rekomandohet që të udhëtojnë në vendet e prekura nga ky virus e sidomos nga vendet që paraqesin rrezik potencial për përhapje te virusit”, thotë Hoti.
Ai thotë se virusi në fjalë përhapet përmes mushkonjave, por jo nga njeriu në njeri dhe se fakti që Kosova nuk shquhet si vend që ka mushkonja të species së veçantë që e shkaktojnë virusin “Zika”, mund të konsiderohet si rrethanë lehtësuese.
Sidoqoftë, ai thotë se me që sëmundja është përhapur edhe jashtë Amerikës Latine dhe Qendrore, rreziku i përhapjes ekziston edhe në vende të tjera, por nuk është i lartë.
“Instituti Kombëtar që është institucion vartës i Ministrisë së Shëndetësisë për të mbikëqyrur shëndetin publik, ka marrë masa adekuate duke rritur shkallën e monitorimit të situatës epidemiologjike, ndërsa masat e ndërmarra konsistojnë në pengimin e pickimit të mushkonjave, duke shkatërruar përmes dezinsektimit vatrat e tyre si dhe ndalimin e shumimit të tyre dhe përhapjen e sëmundjes”, theksoi Hoti.
Sipas Hotit, në rast të shfaqjes së ndonjë rasti sporadik (që mund të jetë rast i importuar), Instituti Kombëtar i Shëndetit Publik është i gatshëm, si në pikëpamje diagnostike, po ashtu edhe të zbatimit të rekomandimeve të përgjithshme të parandalimit, me qëllim që të prekurve eventualë t’u dilet në ndihmë, bashkë me shërbimet përkatëse klinike që ka Kosova.
Si ka lindur virusi “Zika” dhe cilat janë simptomat:
Virusi “Zika” është zbuluar në vitin 1947 në Ugandë, ndërsa rasti i parë në njeri është regjistruar në Nigeri, në vitin 1954. I lindur nga mushkonja, virusi ka qarkulluar në Afrikë dhe Azi për dekada të tëra, dhe së voni në rajonin e Paqësorit, derisa asnjëherë nuk ka shkaktuar shumë shqetësim.
Si sëmundje, virusi “Zika” nuk paraqet ndonjë gjendje të rëndë, duke u manifestuar me shenja të përgjithshme, si: temperaturë , ethe, molisje, plogështi, por që problemet mund të rëndohen në sisteme tjera të organizmit.
Më së shumti raste janë shfaqur në Amerikën Latine, aty ku ka shumë mushkonja, e kjo sëmundje përhapet pikërisht nga mushkonjat, dhe atë nga specie të veçanta, që quhen Edes. Në mënyrë specifike, shumë rrallë të regjistruara, ka pasur raste të bartjes edhe përmes gjakut dhe marrëdhënieve seksuale..
Përpos bartjes së virusit përmes mushkonjave, zyrtarët shëndetësorë në Shtetet e Bashkuara të Amerikës kanë njoftuar se rasti i parë i virusit “Zika” në këtë shtet është marrë edhe nëpërmjet marrëdhënies seksuale, në shtetin Teksas, muajin e kaluar.
Ky raport i autoriteteve në Dallas të Shteteve të Bashkuara thotë se infeksioni është konfirmuar nga testet në Qendrat për Kontrollin dhe Parandalimin e Sëmundjeve.
Zyrtarët në Teksas thanë se pacienti ishte infektuar me virus, pasi kishte pasur kontakt seksual me një person të sëmurë, që ishte kthyer nga vendi, ku virusi “Zika” ishte i pranishëm. /tesheshi.com/
