“Sali Berisha është sot personi i vetëm që i ka mundur socialistët dhe dy herë Edi Ramën”, citohet të ketë thënë ky ish-kryeministër e ish-kryetar PD-je, i cili tashmë, me një “non grata” amerikane mbi shpinë, me inatin e tij tipik politik, po tenton të sfidojë SHBA duke synuar të garojë sërish, nën ëndrrën se mund të fitojë sërish. Pra, të ngjitet sërish në pushtet.
Fraza e tij e mësipërme, u tha në një intervistë të fundit televizive në kontekst të shfaqjes së një superioroteti politik ndaj kundërshtarit në terma elektoralë.
“Sali Berisha është sot personi i vetëm që i ka mundur socialistët…”(!)
Vjen pyetja: Pse, kush duhet të qe tjetër? Sigurisht që ti do jesh. Ah! E ka për Bashën, të cilin e quan humbës serik. Por po t’i referohemi statistikave, në fakt është Berisha humbës serik, afërsisht po aq sa Basha, përballë PS-së, por më shumë përballë Ramës.
Me statistikë, Berisha e ka mundur PS-në tre herë: në 96-ën, paçka manipulimeve të rënda, në Lokalet e po atij viti pak muaj më vonë, si dhe në 2005-ën. Tre fitore përballë dyfish më shumë humbejeve: Në Lokalet e 92-shit, në referendumin kushtetues të 94-ës, në 97-ën, në 2001-shin, dhe pastaj vjen Rama, i cili e dërrmon në tre zgjedhje lokale rresht, duke i marrë më pas pushtetin me fitoren e thellë të 2013-ës.
Rekordin e mban 2007-ta, Lokalet e atij viti, ku Berisha, paçka shumë avantazheve – dy vjet në pushtet, me kandidatin më të mirë në Tiranë, Sokol Olldashin, fotot nudo të kundërshtarit etj., humb pastër, sidomos kryeqytetin.
Edhe pse me këtë bilanc kaq negativ, ai përmend dy fitore ndaj Ramës në frazën e tij. “….I ka mundur socialistët dhe dy herë Edi Ramën”. Cilat janë këto dy herë që u referohet?
Njëra është 2009-ta. Në fakt, është një fitore e diskutueshme, pasi rezultati shkoi gati barazim, gjë që e detyroi Berishën të kërkonte menjëherë ndihmën e Metës me katër mandate për të qëndruar në pushtet. Siç dhe ndodhi.
E dyta është ai ndryshimi i rezultatit në tavolinë për Tiranën, në Lokalet e 2011-ës, me protagonist Arben Ristanin. Me të drejtë, edhe pse ishte Basha në garë me Ramën e jo ai, Berisha ia atribuon vetes fitoren e diskutueshme, pasi ishte vërtet ai orkestruesi i atij lloj rezultati që askush me mend në kokë nuk e pranon. Pra, që pas fitores së qartë të Ramës, edhe pse me 10 vota, del që fitues ishte Basha. Gjithsesi, edhe nëse merret e mirëqenë si fitore demokrate, gjë të cilën s’e pranon as vetë Ristani sot, bilanci është gjithsesi i zymtë për Berishën në raport me PS-në dhe Ramën, por më pak i zymtë në raport me Bashën.
Basha ka humbur 4 palë zgjedhje në 8 vjet. Berisha, në 21 vjet, nga 92-shi, deri në 2013-ën, ka humbur 8 palë zgjedhje.
Kështu që fraza “Sali Berisha është sot personi i vetëm që i ka mundur socialistët dhe dy herë Edi Ramën”, është tipike nga ato spekullativet që tentojnë sajimin e një realiteti virtual që s’përputhet askund me treguesit realë. /tesheshi.com/
