Prokuroria e Shtetit e ka ditur që në fillim të hetimit se pjesëtarët e klanit “Pronto” nuk mund t’i ndjekin për korrupsion.
Ishte pak më shumë se një vit nga parashkrimi i dy veprave penale kur Prokuroria e Shtetit doli me komunikatë se ish-deputeti i PDK-së, Adem Grabovci, dhe zyrtarë të tjerë që kryesisht janë pjesë e PDK-së po hetoheshin për keqpërdorim të detyrës zyrtare dhe ushtrim ndikimi.
Por rreth një vit pas të dy veprat për të cilat PSH-ja njoftoi se po e heton këtë grup ishin parashkruar, kjo pasi që në kohën kur kanë ndodhur bisedat e aferës “Pronto” në fuqi ka qenë Kodi i vjetër Penal, shkruan Koha Ditore.
Të dyja këto vepra me Kodin e vjetër kanë qenë të dënueshme deri në 3 vjet, ndërsa në Kodin e ri janë të dënueshme me 5 respektivisht 8 vjet. Pasi që për të akuzuarit përdoret dënimi me i favorshëm, i bie që Prokuroria qysh në vitin 2016 e ka ditur së këto vepra do të vjetërsoheshin për t’u gjykuar.
Vepra për të cilën po akuzohen tash 11 zyrtarë e ish-zyrtarë të lidhur me PDK-në është shkelje e statusit të barabartë të shtetasve dhe banorëve të Kosovës në bashkëkryerje. /tesheshi.com/
