Tingëllon mahnitëse, por është e vërtetë!
Empatia ka qenë një lëndë e detyrueshme në shkollat në Danimarkë që nga viti 1993, dhe kjo mund të lidhet ngushtë me faktin se sipas një raporti të KB të disa viteve më parë, ky vend u shpall një nga më të lumturit në botë, shkruan portali Bambo Nature.
Ka shumë arsye për futjen e ndjeshmërisë në shkolla. Eshtë provuar se ndihmon në krijimin e marrëdhënieve më të mira, zvogëlimin e ngacmimit midis kolegëve dhe ndihmon në punë. Adoleshentët empatikë janë shumë më të orientuar drejt detyrave dhe qëllimeve, në krahasim me adoleshentët që nuk kanë ndjeshmëri të zhvilluar.
Duke qenë se i gjithë shkollimi në Danimarkë është shumë progresiv dhe i orientuar drejt zhvillimit të aftësive themelore të jetës, nuk është për t’u habitur që kjo lëndë është gjithashtu në listë në shkolla. Një orë në javë i kushtohet mësimeve të ndjeshmërisë dhe ajo studiohet nga fëmijët e moshës 6 deri në 16 vjeç.
Gjatë orës së mësimit, nxënësit diskutojnë për problemet e tyre, pavarësisht nëse ato lidhen me shkollën. Pastaj, së bashku me të gjithë klasën, ata kërkojnë zgjidhje. Baza e zgjidhjeve qëndron në dëgjimin me kujdes dhe kuptimin.
Nëse ndodh që nuk ka probleme që mund të diskutohen, nxënësit mund të kalojnë kohë duke shijuar dhe relaksuar. Eshtë diçka që danezët e quajnë hygge, ku shpjegimi më i thjeshtë është krijimi i një atmosfere të këndshme, të ngrohtë dhe intime.
Puna në ekip është një lidhje kryesore në studimin e ndjeshmërisë. Rezultatet e hulumtimit treguan se 60% e detyrave në shkollat daneze u kryen me ndihmën e punës ekipore. Individët nuk shquhen, por po punohet për të ndihmuar nxënësit më pak të talentuar që kanë nevojë për ndihmë. Duke mësuar së bashku, fëmijët mund të mësojnë shumë më tepër gjëra sesa kur konkurrojnë me njëri-tjetrin për nota më të mira dhe më shumë vëmendje.
Shkollimi ynë nuk është gati aq i përparuar sa Danimarka dhe sigurisht që nuk do të kemi së shpejti mundësinë që fëmijët tanë të mësojnë gjëra kaq jetësore në shkollë, por shpresojmë që me këtë histori t’ju kemi frymëzuar që t’i kushtoni kohë mënyrës daneze të edukimit dhe kujdesit. Fëmijët tuaj do të jenë mirënjohës dhe do ta kenë më të lehtë të përballen me gjithçka që jeta u sjell në të ardhmen, shkruan portali Bambo Nature. /tesheshi.com/
