Pas eliminimit të Shqipërisë nga Europiani me një humbje minimaliste ndaj Spanjës, trajneri brazilian Sylvinho tha sa ndihej i trishtuar, por dhe i kënaqur me paraqitjet.
“Sigurisht që dalim me kokën lart. Ishim në grupin e vdekjes, në një grup me kampionë Europe dhe Bote. Jam i trishtuar për rezultatin, por jo për paraqitjet. Kemi bërë mirë në të gjitha ndeshjet. Kemi luftuar gjithmonë deri në fund”, theksoi udhëheqësi i stolit kuqezi.
“Të gjithë prisnin të humbnim nga 3-0 apo 4-0, por kemi qenë gjithmonë aty në të tri ndeshjet duke luftuar”, tha ai një të vërtetë.
Nga ana tjetër, la të kuptuar se do vijojë ta udhëheqë kombëtaren shqiptare, me synimin për ta çuar tashmë në Botëror.
“Kemi Nations League, më pas eliminatoret e Kupës së Botës. Falënderoj Federatën, gjithë stafin dhe gjithë njerëzit me të cilët kemi punuar. Kemi bërë gjëra të mira, kemi treguar rritje. Është e rëndësishme të vazhdojmë të luajmë dhe të provojmë sërish emocionet e Europianit, por edhe Botërorit”, theksoi ai. /tesheshi.com/
