Resorti Mar-a-Lago në Palm Beach të Floridës, në pronësi të presidentit amerikan Donald Trump, është evakuuar para arritjes së uraganit Irma.
Ai mund të preket nga uragani dhe dilema është nëse do t´i mbijetojë goditjes.
Irma shkaktoi 14 viktima në Karaibe dhe është duke lëvizur drejt Floridës, ku ndodhet edhe resorti i Trump.
Ndërkohë nga Palm Beach janë urdhëruar evakuimet, ndërsa në zonën ku pritet të kalojë uragani jetojnë mbi gjashtë milionë njerëz. Uragani ka kaluar në kategorinë e 4-të dhe erërat kanë një fuqi prej 140 milje në orë.
Resorti i Trump i ka mbijetuar 4 uraganëve më të fuqishëm që kanë përfshirë këtë zonë, tashmë mbetet për t´u parë se çfarë do të ndodhë pas kalimit të “Irma”.
Një kamerier që ka shërbyer për një kohë të gjatë në këtë resort, ka thënë për AP se resorti i Trump është vendi më i sigurt në botë nga uraganet.
“Shtëpia asnjëherë nuk ka qenë seriozisht e dëmtuar”, ka thënë ai.
Trump ka blerë pronën në vitin 1985, për 10 milionë dollarë dhe ajo ishte riparuar më vonë, gjë e cila kishte kushtuar miliona të tjera.
Donald Trump ka kaluar disa fundjava në resort që nga inaugurimi i tij. AP shkruan se vitin e kaluar Trump ka pranuar dëmshpërblimin prej 17 milionë dollarësh për dëmet e shkaktuara në Mar-a-Lago, pas goditjes nga uraganet Frances, Jeanne dhe Wilma në vitin 2005.
Por, kamerieri i Trump thotë se ka pasur vlerësim për dëme të vogla dhe për disa pemë të rrëzuara.
Jeff Masters, drejtor i Shërbimit për parashikim të motit, thotë se rreziku më i madh për Mar-a-Lago nuk do të jetë Irma, por ngritja e nivelit të detit. /tesheshi.com/
