Sekretari i Përgjithshëm i NATO-s Mark Rutte tha në Bratislavë se stabiliteti në Kosovë, Bosnjë dhe Serbi është në interesin e të gjithëve dhe se ai nuk sheh arsye për të besuar se mund të ketë ndonjë ndryshim dramatik në përkushtimin e Amerikës ndaj aleancës ushtarake perëndimore.
Gjatë qëndrimit në kryeqytetin e Sllovakisë, në një debat që ka pasur me studentët, ai është përgjigjur në pyetjen se a e sheh mundësinë që konflikti në Kosovë të vazhdojë, pasi ka spekulime se politika e re amerikane mund të çojë në tërheqje ushtarake amerikane.
“Më lejoni të jem krejtësisht i qartë: kuptimi im për sistemin amerikan është se ata janë plotësisht të përkushtuar ndaj NATO-s dhe angazhimeve aktuale. Por le të shohim se çfarë ndodh. Mund të kemi gjithmonë ndryshime politikash ose rregullime të vogla që mund të ndodhin. Kjo është ajo që po bëjnë sllovakët, holandezët dhe të tjerët”, tha kreu i Aleancës dhe vazhdoi:
“Por nuk kam asnjë arsye të besoj se do të ketë ndonjë vendim dramatik. Dhe në Ballkanin Perëndimor në përgjithësi, ne duhet të sigurohemi që ta mbajmë këtë rajon në fokus sepse stabiliteti në Kosovë, stabiliteti në Bosnje dhe stabiliteti në Serbi është në interesin e të gjithëve ne.”
Deklarata e Rutte vjen në një kohë të marrëdhënieve të tensionuara midis Evropës dhe Shteteve të Bashkuara, pas hapave që administrata amerikane ka ndërmarrë me Rusinë për t’i dhënë fund luftës në Ukrainë. /tesheshi.com/
