Nga Blendi Gashi
Opozita e bashkuar kosovare ka nisur manifestimet në rrugë nëpër komunat të ndryshme kundër dy marrëveshjeve Asocacionit, ndryshe Zajednicës, dhe Demarkacionit me Malin e Zi. Këtë veprim ato e kanë marrë pasi që Kryesia e Kuvendit vendosi që për një seancë plenare të përjashtoi deputetët opozitarë (përveç Ilir Dedës të VV-së dhe Shukrie Bytyqit të NISMA-s).
Opozita u deklarua se atyre nuk u ka mbetur rrugë tjetër përveç daljes në rrugë nëpër të gjitha qytetet e vendit, për të kundërshtuar dy marrëveshjet, siç i vlerësojnë të dëmshme për shtetin.
Manifestimin e parë e mbajtën në Prishtinë, pastaj në Gjakovë, po ashtu manifestuan paqësisht duke thënë se nul lënkunden nga kërkesat e tyre derisa më datë 12 dhjetor do të manifestojnë në qytetin e Gjilanit, për të vazhduar në qytete të tjera.
Por, shtrohet pyetja se a do të rezultojnë të suksesshme manifestimet e opozitës në rrugë?
Përkundër kundështimeve të ashpra nga tri partitë opozitare VV, AAK dhe NISMA, në Kuvendin e Kosovës, ku pushtetin e gjuajtën me vezë, shishe uji e gaz lotsjellës, mazhoranca nuk u zbraps dhe nuk pranoi të anulojë marrëveshjet.
Analistë politikë thonë se manifestimet nëpër komuna të Kosovës, zorr që do të sjellin rezultate të pritshme nga opozita.
Analisti politik, Ali Hertica, thotë për tesheshi.com se manifestimet që po organizon opozita kosovare nuk janë të bujshme dhe sipas tij kjo u hetua më së miri në manifestimet që u mbajtën në Prishtinë e Gjakovë, andaj nuk beson se do të përfitohet diç.
“Nuk besoj se do të ketë ndryshim apo tërheqje të nënshkrimeve nga kryeministri Mustafa. Manifestimet e tilla nuk do të kenë kurrfarë rezultati, sepse marrëveshjet janë të nënshkruara edhe nga faktori ndërkombëtar dhe nuk do të anulohen. Opozita duhet të shtojë presion vetëm për daljen në referendum dhe qytetarët të vendosin për Asociacionin ose shkuarjen në zgjedhje”, vlerëson Hertica.
Njohësi i rrethanave politike në vend, Kushtrim Gashi, vlerëson se manifestimi në Prishtinë, por edhe në Gjakovë dhe të tjerat që do të organizohen në të gjitha komunat e Kosovës, assesi nuk do të kenë ndikim në anulimin e marrëveshjeve dhe do të jenë pa asnjë rezultat.
“Zgjidhjen e kësaj krize politike nuk mund ta zgjidhin as manifestimet, as gazi lotsjellës, as dhuna e ushtruar ndaj policëve e qytetarëve, pos dialogu politik në mes pozitës dhe opozitës. Krizat politike zgjidhen vetëm me mjete politike e assesi me metoda dhe forma tjera të dhunshme”, shprehet Gashi për tesheshi.com.
Edhe analisti Imer Mushkolaj ka deklaruar për media se marrëveshjet mund të anuloheshin vetëm atëherë kur opozita e përqendron presionin në qendër të Kosovës, Prishtinë.
“Nuk ma merr mendja që qeveria ka me i tërheq marrëveshje e arritura mes Kosovës dhe Serbisë me manifestimet që po i mban opozita nëpër komuna. Do të ishte ndryshe sikur protestat, ose manifestime të tilla të organizoheshin në qendër, përkatësisht në Prishtinë, dhe të ishin të vazhdueshme në mënyrë që presioni të rritej edhe, eventualisht, zoti Mustafa dhe qeveria në përgjithësi të reflektojë, por nuk besoj që këto manifestime nëpër komuna do të jetë presioni aq i fortë sa qeveria të vendos që t’i tërheqë këto marrëveshje”, ka deklaruar ai.
Ndryshe, të shtunën opozita e bashkuar do të mbajë manifestimin e radhës në qytetin e Gjilanit, ku sërish do të flasin tre liderët e partive opozitare. /tesheshi.com/
