Nga Blendi Gashi
Kuvendi i Kosovës për herë të gjashtë më 24 gusht do të mblidhet për të vazhduar seancën konstituive, konkretisht për të zgjedhur kryekuvendarin e nënkryetarët.
Me këtë rast koalicioni PDK-AAK-NISMA do rikthehet në seancë pas bojkotit dy javor dhe do të propozojë kandidatin e saj, që sipas të gjitha gjasave do të jetë Kadri Veseli.
Ky koalicion ka kohë edhe katër ditë për t’i bindur deputetët që të japin votën “pro” Veselit edhe për një mandat në krye të institucionit ligjvënës, çka në seancat e kaluara nuk i kanë pasur.
Pas votimit të Veselit në postin e kryeparlamentarit, ky koalicion ka shprehur bindjen se do të zgjedhë edhe kryeministrin, por pa treguar nëse do thirret seancë e re më 25 apo 26 gusht për zgjedhjen e qeverisë së re.
Përkundër deklarimeve të tilla, situata politike është e mjegullt sa i përket krijimit të institucioneve të reja pasi Veseli e Haradinaj nuk i kanë votat të sigurta, ndaj e enjta do jetë përcaktuese nëse do thellohet kriza apo do tejkalohet.
“Institucionet në dorën e Pacollit”
Njohësit e rrethanave politike thonë se vendimet që do marrin deputetë të caktuar dhe konkretisht AKR-ja e Pacollit do të jenë përcaktuese nëse do formohen apo jo institucionet e reja.
Politologu Mentor Tahiri pohon se ditët e fundit, matematika rreth votave mund të ketë ndryshuar, kjo pas deklarimeve nga AKR, parti e cila ka lëënë të hapur mundësinë të rreshtohet në një vijë me PAN-in.
Sipas tij, shpresa e PAN-it që më 24 gusht të bëjë votat qëndron pikërisht te 3 mandatet e deputetëve të AKR-së, pasi Korab Sejdiu ka bërë të qartë votën kundër.
“Është për të ardhur keq fakti se në PAN janë të shqetësuar vetëm për numrat minimal, ndërsa duket se nuk ka asnjë preokupim lidhur me funksionimin e mëtejshëm të një qeverie të tillë. Kjo do të jetë qeveria më e brishtë në historinë pluraliste të Kosovës së pasluftës. Duket qartë, se PAN është i prirur vetëm të akomodojë individë, por jo edhe për një funksionim normal të shtetit”, thotë Tahiri për tesheshi.com.
Seb Bytyqi, lektori i shkencave politike në Universitetin e Uinçesterit në Angli, thotë se konstituimi i Kuvendit do të ndodhë vetëm nëse PAN arrin një marrëveshje paraprake me ndonjë subjekt tjetër.
“Metoda e synimit të deputetëve individual pati sukses të pjesshëm dhe nuk i siguroi 61 vota.
Subjekti që ka gjasa më së shumti të votojë pro PAN-it është AKR-ja.
Mirëpo nëse kjo parti vendos të rrijë besnike ndaj LDK-së e Alternativës atëherë vështirë se mund të konstituohen organet e Kuvendi.
Në bazë të deklaratave të detitanishme të AKR-së nuk mund të ketë konstituim”, thotë Bytyqi për tesheshi.com.
Faik Krasniqi, njohës i rrethanave politike thotë se varet nga deputetë të caktuar nëse PAN do arrijë të zgjedh kryetarin e Kuvendit dhe kryeministrin.
“Nëse ndonjëri nga deputetët e koalicionit LAA nuk shitet tek koalicioni PAN, atëherë Kadri Veseli nuk do mund të zgjidhet kryetar. Por konfirmimi i koalicionit PAN se në seancën e 24 gushtit do të propozojnë kandidatin për kryetar Kuvendi, është një sinjal se i kanë siguruar votat për krijimin e institucioneve të reja”, thotë Krasniqi për tesheshi.com. /tesheshi.com/
