Një gazetar grek i cili mbulonte bisedimet në Bruksel, shkroi në Twitter pasi kryeministri Aleksis Cipras dha reagimin e vet të parë për marrëveshjen: “Mund të jetë nga lodhja, por Cipras tingëllonte si një person jo i sigurtë sesi ta shesë këtë marrëveshje në Greqi e më pas, ta zbatojë atë”.
Gazetari Nick Malkoutzis ka qenë gjithë kohës pranë bisedimeve. Liderët e tjerë të eurozonës mund të shkojnë të flenë pas lodhjes së natës, por Cipras duhet të rikthehet në Greqi dhe të miratojë ligjet e reformave deri të mërkurën.
Parlamenti grek ka në dorë tashmë fatin e marrëveshjes, e kjo duket të jetë një pikë e vështirë, pas kundërshtisë dhe debateve që ka nxitur “dorëzimi” i Cipras në Bruksel mes vetë përfaqësuesve të Syriza-s.
Me gjasa, sipas shtypit grek, edhe parlamenti do të dorëzohet përballë kërcënimit gjerman. Analistët thonë se Gjermania ishte e vendosur ta detyronte Greqinë të linte eurozonën, nëse Cipras nuk do të pranonte kushtet.
Në situatën aktuale në Greqi, me bankat e mbyllura dhe perspektivën që ato të mos hapen shpejt për shkak të mungesës së likuiditetit, duket se dhe deputetët në parlament mund të pranojnë marrëveshjen.
Cipras duhet të bindë të vetët sepse Opozita konservatore është e gatshme të votojë paketën pasi ka qenë që në fillim për zbatimin e kushteve të kursimit që I kishte firmosur vetën kur kryeministër ishte Samaras. /tesheshi/
