Ndër episodet më trishtuese të aksionit të djeshëm policor në selinë e Vetvendosjes në Prishtinë për të prangosur Albin Kurtin, ishte dhe ai i prangosjes së një burri në moshë, me fytyrë të gjakosur, i cili dilte nga selia e VV-së nën shoqërimin e dy policëve. Bëhet fjalë për Gani Krasniqin, një ndër ish-drejtuesit kryesor të UÇK-së dhe baba i dy dëshmorëve.
Nisur nga kjo e dhënë, kjo pamje është shumë më e rëndë se ajo e arrestimit të Albin Kurtit, i cili doli nga selia e partisë së tij në të ftohtin e Prishtinës edhe pa xhup, duke e shndërruar arrestimin e tij në një akt ordiner, sikur të bëhej fjalë për një person krejt ordiner, ndërkohë që është deputet dhe, sado kontarvers në aksionet e tij politike, ka një cak trajtimi i tij si ordiner nga ana e shtetit, policisë në këtë rast.
Por pamja e Gani Krasniqit ia heq çdo legjitimitet aksionit policor kinse të mbështetur në ligj, për t`ja çuar drejtësisë një person që ka shkelur ligjin në emër të ligjit; ajo pamje është një dekonspirim i rëndë moral i udhëheqësisë aktuale të Kosovës, posaçërisht i Hashim Thaçit si ish-lider UÇK-je, në raport me djeshmen e luftës.
Mjaft të ngrihet në mënyrë hipotetike një pyetje: po të ishte gjallë Adem Jashari e të ndodhej dje në selinë e VV-së, a do arrestohej në këtë mënyrë?!
Eshtë e rëndë po ta çosh në mendje se po, kështu siç kanë shkuar punët, si ka degraduar politikëbërja e Prishtinës dhe posaçërisht e udhëheqësisë së Kosovës, po, edhe Adem Jashari dora vetë, do kish patur të njëjtin fat: i arrestuar, nën prangat e bashkëkombasve të tij. /tesheshi.com/
