Niveli i mosbesimit mes dy palëve është më i lartë se kurrë më parë, tensionet janë ende të larta, por është e rëndësishme që liderët në Serbi dhe Kosovë të fillojnë të krijojnë një atmosferë të përshtatshme për bisedime produktive për normalizimin e marrëdhënieve, tha përfaqësuesi i Bashkimit Evropian për dialog, Miroslav Lajçak.
Ai tha për Politico se është e rëndësishme të mos lejohet që situata të kthehet në një krizë të re.
“Aktualisht, ne kemi një strukturë shumë të mirë: kemi vëmendjen e liderëve kryesorë të SHBA-së dhe Bashkimit Evropian dhe kemi bashkëpunim jashtëzakonisht të mirë mes Amerikës dhe BE-së, kështu që kjo është një mundësi ideale për të zgjidhur situatën, diku deri dhjetor 2023 ose fillimi i vitit 2024”, tha Lajçak.
Afati i fundit janë zgjedhjet në SHBA dhe BE
Zgjedhjet për Parlamentin Evropian dhe zgjedhjet presidenciale amerikane, siç raporton Politico, janë të planifikuara për vitin 2024, dhe nëse, thotë Lajçak, “gjërat nuk zgjidhen deri atëherë, do të duhet të fillojmë nga e para”.
“Nëse i kthehemi krizës dhe konflikteve, atëherë mund të harrojmë afatet,” paralajmëroi Lajçak.
Lajçak beson se nëse humbet momenti, mosmarrëveshja mund të zvarritet për dekada.
“Shpresoj që në shtatë ditë të mos përballemi me një krizë tjetër – ose mund të harrojmë normalizimin,” vuri në dukje ai. /tesheshi.com/
