Arabia Saudite ka kërkuar nga muslimanët që të presin derisa situata me koronavirusin të përmirësohet para se të fillojnë të planifikojnë një udhëtim në Haxh, tha të martën ministri i Haxhit dhe Umra-s (dy rituale në Mekë), për televizionin shtetëror.
Rreth 2.5 milion besimtarë nga e gjithë bota vizitojnë Mekën dhe Medinën, vendin e shenjtë të Islamit, në një ritual të përvitshëm në kohë të caktuar (Haxhi).
Tubimi më i madh vjetor i besimtarëve muslimanë, njëherësh tubimi më i madh njerëzor në botë, këtë vit korrespondon në fund të korrikut, por përhapja e koronavirusit në botë ka ngritur pyetje nëse riti duhet do duhet të mbahet pikërisht në këtë kohë, e kjo për shkak të rrezikut të përhapjes së mëtejshme të infeksionit.
Ndërkohë, Arabia Saudite tashmë ka anulluar Umra-n (ritual i ngjashëm me Haxhin dhe jo në kohë të caktuar) deri në njoftimin e mëtejshëm, duke pezulluar të gjitha fluturimet tregtare ndërkombëtare, e njëherësh ndalon hyrjen dhe daljen në disa qytete, përfshirë Mekën dhe Medinën.
Anulimi i Haxhit do të ishte një veprim i paparë në epokën moderne.
Deri më sot, Arabia Saudite ka raportuar rreth 1.500 raste të infeksionit dhe 10 vdekje.
Më parë, në vitin 632, shumë pelegrinë e pësuan nga malarja, ndërsa kolera e vitit 1821 shkaktoi vdekjen e rreth 20,000 besimtarëve. Në epideminë e dytë të kolerës të vitit 1865, ndërruan jetë rreth 15,000 pelegrinë. /tesheshi.com/
