Që kur i ra me grusht folëses si kryebashkiak, me përbetimin se nuk ka burrë nëne e “bir kurve që t’i kërkojë paratë…”, duke aluduar se askujt s’i ka futur dorën në xhep, kryeministri Rama e ka patur gjithnjë me merak të theksojë se ai, edhe në gaboftë në qeverisje, kurrë nuk korruptohet, apo se, mund t’i korruptohen bashkëpunëtorët, vartësit, të afërt apo të largët, por kurrë ai. Dhe jo vetëm kaq, te ai kurrë nuk kanë mbrojtje ata që korruptohen.
Për kërë arsye, pak kohë më parë madje ai do i qasej dhe teologjikisht kësaj çështje, duke kujtuar se në pikëmbarritjen finale, varrin, askush nuk merr dot me vete pasurinë, aq më pak atë të bërë padrejtësisht.
E megjithatë, vështirë që qeverisjes së tij të deritanishme t’i hiqet njolla e rëndë e ndër më të korruptuarave në 30 vjet, edhe sikur ai vetë, siç përbetohet, nuk ka futur një qindarkë korrupsioni në xhep.
Ama duhet të dijë, se në pushtetin e tij, ky fenomen është në nivele të hatashme, të frikshme. Jo gjithkund, jo te të gjithë, por te një pjesë e mirë po.
Tek e fundit, do mjaftonin inceneratorët, që sado avokaturë të fortë të kenë, vështirë të mbrohet hataja e atyshme. Nëse do ishte e kundërta, dy personazhet e tyre kryesore nuk do i fshiheshn drejtësisë. Klodian Zoto dhe Stela Gugallja janë në kërkim.
Së fundi, Rama përcolli një tjetër përbetim pastërtie morale te vetja e tij. E bëri këtë madje me një kërkim falje ndaj shqiptarëve. Dhe siç duket, në mendje ka patur inceneratorët, apo ndoshta jo vetëm.
“U kërkoj ndjesë për gabimet e mia, pasi asnjë prej tyre nuk është një gabim për të përfituar në kurriz të të tjerëve”, tha Rama gjatë një ceremonie të ngritjes së flamurit të BE-së në Kryeministri, një ditë pas çeljes së negociatave.
Edhe në qoftë e vërtetë kjo, pra që ai s’e ka ngjyer kurrë gishtin në të keqen e madhe, gati të pazhbëshme në Shqipëri, fakti që nuk ka arritur ta frenojë në aq sa po qeveris, tregon një farë dështimi qeverisës.
Sepse, të jesh një kryeqeveritar i sukseshëm në Shqipëri, më shumë se të ndërtosh, të reformosh, të përmisosh, të zhvillosh, duhet të çmontosh. Dhe ai është korrupsioni. Nëse s’ke bërë këtë gjë, pothuajse s’ke bërë asgjë, edhe nëse vërtet ke bërë diçka. /tesheshi.com/
