Kompania spanjolle e modës Zara publikoi foto reklamuese për koleksionin e ri duke shkaktuar reagime të shumta negative.
Kjo pasi fushata e saj reklamuese u kujtoi shumë njerëzve vuajtjet e njerëzve në Palestinë, ndaj shumë përdorues bënë thirrje për bojkot të kompanisë së njohur.
Siç mund të lexohet në komentet në rrjetet sociale, reagimi është për mbështjellëset e bardha në reklamë, të cilat i lidhnin me trupa të pajetë të mbështjellë.
Fushata përmban gjithashtu gurë, rrënoja dhe një prerje kartoni që i ngjan një harte të Palestinës.
“Jeni demonë të neveritshëm. Nuk mund ta besoj atë që po shikoj”, ka shkruar një përdorues i rrjeteve sociale.
Një tjetër shtoi: “Mendoni se është normale që vdekjet e 20,000 njerëzve të përdoren si një marifet marketingu? Mos dilni përpara dhe thoni se nuk doje të…”.
“Kjo është e neveritshme!! Sa turp!! Keni krijuar një fushatë të bazuar në gjenocidin që po ndodh në Gaza. Njerëz të pafajshëm po vdesin”.
Lëvizjet e kompanisë së modës kanë çuar në një numër të konsiderueshëm njerëzish që bëjnë thirrje për një bojkot të Zaras, një markë që nuk ishte e lidhur më parë me mbështetjen e pushtimit izraelit.
Platformat e mediave sociale janë përmbytur me hashtags që i shtyjnë konsumatorët të rivlerësojnë besnikërinë e tyre ndaj markës, duke rezultuar në dëmtim të mundshëm afatgjatë për reputacionin e Zaras.
Zara deri më tani nuk ka dhënë asnjë përgjigje apo deklaratë publike në lidhje me fushatën, por kanë fshirë fotot e publikuara më parë nga rrjetet sociale. /tesheshi.com/
