Nga Albuena Jahaj – Hoti
Që nga ditë e pavarësisë 9 vjet më parë, monumenti simbol, NEWBORN, i shfaqur dhe si një sprovë artistike – futet tek gjinia e instalacionit – ka ndryshuar më pas pamje çdo vit, në çdo përvjetor, duke përcjellë dhe mesazhe përkatëse të cilat kanë qenë të lidhura me momentin aktual në të cilin ka kaluar Kosova. Po këtë vit, ç’surprizë do ofrojë NEWBORN -i?
Kësaj herë nuk do ndërhyet në pamje, por dhe në shkronja. “N”-ja dhe dy “E”-të do bijnë për t’ja lënë vendin një tjetër fjale, një tjetër mesazhi: “Nowalls” – Jo mureve pra. Dhe kjo është mëse e kuptueshme, referuar asaj çfarë po ndodh në veriun e Mitrovicës, atje ku pavarësia, por as çlirimi i Kosovës ende nuk janë prezente; dhe jo vetëm.
Fisnik Ismaili, autor i NEWBORN-it, njëherësh deputet i Vetëvendosjes, tha për tesheshi.com se meqenëse muret janë bërë teme aktuale në krejt botën, dhe në Kosovë po ashtu ideja ka qenë që në këtë formë të jemi kundër mureve.
“Ketë vit NEWBORN do të ngjyroset si mur,do të rrëzohen dy shkronja, për të qenë një shenjë proteste se muret duhet rrëzuar dhe kjo nënkuptohen të gjitha muret, kudo janë shfaqur ato dhe jo vetëm në Mitrovicë; fizike ose virtuale, por me simbolikën e ndarjes”, tha Ismaili.
Dhe si shembull ai përmendi murin e vizave për kosovarët, ngritur nga ndërkombëtarët.
Që nga shpallja e Pavarësisë se Kosovës në vitin 2008 NEWBORN u shndërrua në një simbol të fuqishëm, po si ankronimi heroik UÇK, por me ndryshimin që se u bë dhe objekt me tërheqje turistike.
Kujtojmë se vitin e kaluar, NEWBORN u ngjyros në të kaltër si një qiell i rrethuar me tela me gjemba, që edhe atëherë ishte mesazhi i njëjtë, ai për mosliberalizmin e vizave për qytetarët e Kosovës. /tesheshi.com/
