Nga Blendi Gashi
Dalja e Britanisë së Madhe nga Bashkimi Europian, e cila u vendos me anë të një referendumi nga britanikët, ndikim pritet të ketë sa i përket të ardhmes evropiane të Kosovës dhe vendeve tjera të Ballkanit Perëndimor.
Ndërsa ministri i Jashtëm Enver Hoxhaj e pranoi se pas daljes së Britanisë nga BE, kjo e fundit do të merret më pak me Kosovën, kryekuvendari Kadri Veseli theksoi se Kosova do të vazhdojë rrugëtimin për integrim në BE.
Por, sipas njohësve të integrimeve evropiane dhe analistëve në vend, dalja e Britanisë nga BE nuk mund të paraqesë probleme për të ardhmen evropiane të Kosovës..
Vigan Qorrolli, ligjërues i të drejtës dhe marrëdhënieve ndërkombëtare ne Fakultetin Juridik të Universitetit të Prishtinës, thotë se dalja nga BE-ja e Britanisë së Madhe është një vendim i pritshëm dhe aspak i habitshëm. Ai thotë se ky vendim është një raport i vështirë 43-vjeçar midis Britanisë dhe BE-së me plotë dashuri dhe urrejtje, e kjo përbën një pikë kthese në historinë e Britanisë.
Por sa do të ndikoj ky vendim në përspektivën evropiane të Kosovës?
Profesor Qorrolli shprehet se për Kosovën nuk do te ketë asnjë impakt, meqë Unioni Evropian do të vazhdojë të ekzistojë në këtë format edhe për dy vite të tjera.
“Në vitin 2018 pritet një reformë rrënjësore meqë shtegu i daljeve nga ky klub elitik evropian tashmë është hapur. E djathta ekstreme po përhapet gjithandej nëpër Evropë në kushtet e tmerrshme të stërmbushjes me refugjatë nga Lindja e Mesme, që në historinë politike botërore njihen si dyndje të popujve – derisa kanë filluar zërat në Francë dhe Holandë për referendume të ngjashme. A do të ketë një Frexit pas Brexit – pritet të shihet, por një gjë është e sigurt: pas ditës së sotme, Unioni Evropian nuk do të jetë i njëjtë”, ka thënë Qorrolli, për tesheshi.com.
Ai deklaron se arsyet e daljes janë të ndryshme por, më kryesorja është ajo se qytetarët britanikë kërkuan më shumë pavarësi për Britaninë nga Unioni.
Islam Krasniqi, analist politik shprehet se dalja e Britanisë së Madhe nga BE-ja e komplikon dhe e vështirëson rrugëtimin e Kosovës drejt BE-së, sepse Britania është një vend që Kosovës i ka zgjatur dorën dhe e ka përkrahur gjithmonë në çdo proces integrues.
“Mirëpo Republika e Kosovës duhet të punojë edhe me shumë që të anëtarësohet në instanca tjera ndërkombëtare si në OKB, në NATO etj, sepse rruga drejt BE-së nuk është e sigurt, sepse Britania ka qenë shembull gjithmonë për zhvillime të reja dhe mundet që edhe vendet tjera anëtarë të ndjekin hapat e saj.
Duhet të kuptohet së dalja e Britanisë së Madhe padyshim që e komplikon rrugën e shtetit tonë drejt Bashkimit Evropian, sepse tanimë e ardhmja e BE-së është në një udhëkryq. Pra BE është drejtë shpërbërjes dhe ne si evropian duhet me qenë të dëshpëruar, ndërsa si kosovar të shqetësuar. Pramendoni në një moment se çfarë do të bënte klasa politike në Kosovë po të mos ekziston Bashkimi Evropian. Do të ishte e tmerrshme. Këta politikanë do të sundonin me ligjin e ‘xhunglës’ dhe askujt nuk do t’i jepnin llogari”, ka thënë Krasniqi, për tesheshi.com
Lumir Abdixhiku, njohës i çështjeve ekonomike në vend ka deklaruar për mediat se për Kosovën ky është një lajm jo i mirë.
Ai tha se para goditjeve ekonomike Kosova dhe regjioni do të marrin goditje politike dhe se ky proces do ta ngadalësojë rrugëtimin e Kosovës për në BE dhe idenë e zgjerimit të Ballkanit Perëndimorë.
“Për Kosovën në veçanti, e rajonin në përgjithësi, BE ka qenë një stacion përfundimtarë ku problemet e tanishme do të marrin fund. Tash që ky stacion është dëmtuar, edhe rrugëtimi jonë do të jetë më i ngadaltë”, ka deklaruar Abdixhiku.
Ndryshe, rezultatet e referendumit treguan se shumica e britanikëve ishin pro daljes nga BE me 51,9 për qind, kurse 48,1 përqind e britanikëve dëshironin që të mbeten në BE./tesheshi.com/
