Bilanci i asaj që ndodhi në Nicë të Francës në orët e mesnatës së ditës së shkuar është bërë akoma më tragjik. Numri i të vdekurve nga kamioni që u fut mes turmës ka vajtur në 84, mes të cilëve ka shumë fëmijë. 18 persona të tjerë janë në gjendje kritike.
Një burim policor i ka deklaruar agjencisë së lajmeve Reuters se njeriu që kreu masakrën e mbrëmshme me kamion është një 31-vjeçar franko-tunizian i lindur në Tunizi. Ai ka qenë i njohur për policinë për vjedhje dhe dhunë, por nuk është gjendur në listën e vëzhgimit të shërbimeve sekrete franceze.
Ngjarja ndodhi mbrëmë në Nicë rreth një orë para mbarimit të ditës, ndërsa një kamion e mori me vete turmën që po festonte Ditën e Bastijës. Drejtuesi i kamionit u qëllua për vdekje nga policia, kurse autoritetet deklaruan se ai kishte hapur dhe zjarr mbi turmën. Raportohet për armë dhe granada në kamion, por burime të pakonfirmuara, sipas asaj çka njofton, The Guardian, se pushkët ishin të rreme e se granada ishte joaktive.
Presidenti francez, François Hollande, e përshkroi sulmin si të përbindshëm, dhe deklaroi se do të kishte dislokim të ushtarëve për t’i ardhur në ndihmë policisë dhe xhandarmërisë, veçanërisht në kufijtë e vendit. Ai tha se sulmi qe terrorist. Gjendja e jashtëzakonshme në vend, që pritej të merrte fund më 26 korrik, do të vijojë dhe për tre muaj të tjerë. /tesheshi.com/
