Fondi Monetar Ndërkombëtar (IMF) konsideron se vendet përëndimore mund të përfitojnë nga fluksi i emigrantëve.
Shumë vende kanë nevojë për fuqi të kualifikuar pune. Megjithatë, shumë emigrantë kanë ngelur në Greqi, vendin e përfshirë nga kriza ekonomike, ku papunësia ka kapur shifrën prej 25%.
Me mbylljen e kufirit në veri, ka humbur shpresa për hapjen e dyerve në drejtim të Perëndimit.
Dhjetëra mijëra njerëz kanë mbetur në ngujuar në Greqi. Me kalimin e kohës kanë filluar shenjat e para të hapjes së bizneseve joformale si berberë, me tezga për shitje të fast-food-ve dhe zarzavateve; madje edhe shkolla, që i bie se edhe vetë janë të vetëdijshëm se nuk do ta lëshojnë këtë vend për një kohë të shpejtë.
“Kjo punë nuk na sjellë ndonjë përfitim, por është me rëndësi të vazhdojmë me jetën tonë derisa të hapen kufinjtë”, thotë emigrantja Raied Anbtauy.
Fondi Monetar Ndërkombëtar konsideron se vendet si Gjermania mund të përfitojnë nga fluksi i emigrantëve. Por problemi është se këto vende, emigrantët i shohin vetëm si kosto.
“Sigurisht se kostoja është më e madh sesa përfitimi. Vendi ynë deri tani ka harxhuar më shumë se një milliard euro në emigrantë, ndërsa ndodhemi në krizë ekonomike. Kështu që për ne është situatë shumë e rëndë. Shtetet e pasura si Gjermania po kërkojnë mënyra se si t’i përfshijnë emigrantët në tregun e punës, ndërsa Greqia nuk ka çfarë t’u ofrojë, ngase mezi jemi duke mbijetuar vetë. Pyetja që shtrohet vetëvetiu është se çfarë mund të punojnë këtu emigrantët për të mbijetuar?! Atë çfarë shteti nuk mund t’u sigurojë në këtë qytet, emigrantët mundohen ta sigurojnë vetë’’, thotë Yiannis Mousalas, ministri grek për emigrim.
Emigrantët e kanë marrë hotelin e braktisur City Plaza, i cili është mbyllur pas falimentimit. Ata menaxhojnë atë; ziejnë, pastrojnë dhe ofrojnë strehë mbi kokë për 400 persona, dhe gjithë këtë me ndihmën e vullnetarëve grekë dhe donatorëve privat.
Emigranti Mohammed Halabia tregon dhomën e tij. Ai është ekspert i IT nga Siria. Eshtë tipi i shkathët, prej të cilit Greqia mund të përfitojë shumë, por shteti nuk ka ku të shfrytëzojë përvojën e e tij.
“Nëse dëshiron të mbetesh në Greqi, duhet të dish se këtu vendi po kalon nëpër një krizë. Nuk ka punë, ndërsa nëse bën një xhiro nëpër qyteti, do të shohësh nëpër rrugë njerëz të pastrehë “, thotë Mohammed.
Hotel City Plaza është simbol i krizës greke. Në vitin 2004, kur kishte para me bollëk, ishte rinovuar dhe zbukuruar për Lojërat Olimpike.
Sot është kamp i refugjatëve, një prej shumë sosh në këtë vend. /tesheshi.com/
Marrë nga: Al Jazeera. Titulli është redaksional
