Kuvendi i Kosovës mbajti një seancë për 8 Marsin ku gratë deputete denoncuan raste dhune, deri dhe viktimash në radhët e tyre
Fillimisht, ishte deputetja e Vetëvendosjes, Fatmire Mulhaxha-Kollçaku, ajo e cila bëri një bilanc.
“Janë bërë dhjetë vite nga hyrja në fuqi e ligjit për dhunën në familje, nga viti 2008 e deri me sot me shumë se 15 gra janë vra, mbi 20 mijë gra kanë raportuar dhunën në familje, ndërsa mbi 68 për qind e grave kanë përjetuar dhunë në forma të ndryshme. Jemi të sigurt se drejtësia për secilën grua është e stërvonuar me vet faktin se sa lëndë janë trajtuar nga ana e drejtësisë. Edhe ato pak raste që janë trajtuar vendimet kanë qenë shumë të buta në krahasim me krimin e bërë në familje. Statistikat mbi dhunën në familje e dëshmojnë këtë gjendje. Nga janari deri në dhjetor 2017 janë evidentuar 1196 raste të dhunës në familje”, tha Kollçaku.
Kjo ka bërë që t’i bëhet më pas dhe një profil psikologjik burrit që ushtron dhunë ndaj gruas. “Dhuna buron nga paedukata, nga i ligu që nuk mund të menaxhojë vetën dhe situatën, për fat të keq si instinkt natyror me daljen e njeriut nga shpella, tha deputetja e LDK-së, Lirie Kajtazi.
Më pas e morri fjalën dhe kryeministri Haradinaj, i cili premtoi ndëshkim për ata që prekin gratë.
“Detyra ime sot është të them se qeveria e vendit, institucionet e vendit e ndjejnë përgjegjësinë, barrën që iu takon, detyrat që i kanë që dhuna në familjet tona të ndalet, mos të ndodh dhe e përshëndesim këtë seancë, këtë debat parlamentar”, u shpreh Haradinaj. /tesheshi.com/
