Nga rezultati paraprak i zgjehdjeve të 25 qershorit Partia Socialiste nën drejtimin e Edi Ramës ka një numër rekord mandatesh, 74 deputetë. Por mesa duket kaq fituesi kanë nisur të vijnë deputetë të tjerë që kanë dalë nën siglën e partive të tjera.
Deputetja e parë që iu bashkua PS-së ishte ajo e Dibrës, Reme Lala, e cila fitoi nën siglëne PDIU-së. Lala, vajza e një biznesmeni të njohur dhe me influencë në zonë, Ymer Lala, deklaroi se mandati i saj i përket Edi Ramës, fill pasi mori vesh fitoren. Ajo e bëri “hasha” partinë e çamëve duke pranuar kësisoj se sigla e PDIU-së i duhej thjesht për efekt gare.
Tom Doshi, deputet i Shkodër, që këto zgjedhje fitoi nën siglën e PSD-së së Skënder Gjinushit, po ashtu ka deklaruar votën e tij për qeverinë e re socialiste.
Doshi ishte deputet i PS-së deri në përplasjen e famshme me Metën dhe Ramën dhe përjashtimin e tij nga kjo parti. Por mesa duket edhe Doshi nuk ka në plan të rrijë në opozitë ndaj i shtohet numrit në rritje të mandateve të PS-së.
Edhe dy deputetët e PDIU-së në Elbasan, Aqif Rakipi dhe Bujar Muça, të ndodhur në Kuvend pa kryetarin e partisë, Shpëtim Idrizi, i cili rrezikon të humbë mandatin e tij në Tiranë, pritet t’i bashkohen mazhorancës qeverisëse.
PDIU ishte në bashkëqeverisje me Ramën dhe deputetët e saj nuk kanë bërë fushatë kundër PS-së, kështu vota e tyre natyrshëm do të vijojë të mbetet për qeverisjen e majtë.
Nuk është çudi që në ditët në vazhdim të tjerë deputetë nga jashtë PS-së t’i bashkohen listës fituese në Kuvend dhe pse janë zgjedhur me parti të tjera dhe nuk është çudi që shkarje të ketë nga lista e LSI-së, e cila u “dënua” të rrijë në opozitë për herë të parë pas 8 vitesh në pushtet. /tesheshi.com/
