Nga Blendi Gashi
Marrëveshja IPA 2016 ndërmjet Kosovës dhe BE-së, që i sjell vendit 71,15 milionë euro, të cilat do të shpërndahen në sektorë të ndryshëm, ka bërë si kurrë më parë bashkë pozitën dhe opozitën, ku 98 deputetë votuan pro, pa vota kundër dhe abstenim.
Megjithatë ky unitet nuk ishte në seancën e së hënës kur LDK-ja përmes kryetarit të saj Avdullah Hoti kërcënoi kryeministrin Haradinaj se nëse neglizhon Kuvendin nuk do të japë votën pro kësaj marrëveshje ndërkombëtare.
“Nëse ju (kryeministër) nuk qëndroni për të dhënë llogari si është formuar qeveria, për pazaret politike, ne nuk do të qëndrojmë për votimin e marrëveshjes IPA që kërkon 2/3 votat e opozitës”, tha Hoti në seacën e së hënës kur debatohej për programin e qeverisë.
Ky deklarim i LDK-së u vlerësua i ngutshëm nga deputetë të caktuar, ku vlen të përmendet reagimi i Andin Hotit të PDK-së, i cili tha se kolegu i tij nga LDK Avdullah Hoti sigurisht ka bërë shaka kur ka deklaruar se nuk e voton IPA-n dhe beson se do ta japin votën pro.
Por ky i fundit reagoi duke thënë se asnjëherë nuk bën shaka kur ju drejtohet deputetëve.
Megjithatë koha tregoi se Andini i PDK-së kishte të drejtë pasi LDK të martën mbrëma përmes një deklarate paralajmëroi se do të votoj IPA-n, ndërsa arsyetoi edhe deklarimin kundër të kreut të deputetëve të tyre.
LDK tha se marrëveshja e IPA-s është negociuar nga qeveria “Mustafa” ashtu si edhe prioritetet që janë përcaktuar në këtë marrëveshje.
“I duhen votat e deputetëve të opozitës shqiptare. Ne do të votojmë nesër (sot) në seancë të rregullt. Sigurisht që nuk mund të lejojmë që një marrëveshje e tillë të mos ratifikohet. Në marrëveshje shkruan tekstualisht se fondet ndahen në përputhje me prioritetet e Qeverisë së Kosovës bazuar në strategjinë zhvillimore 2015-2018. Me sjelljen tonë, ne sot i treguam Qeverisë se për të votuar marrëveshje të rëndësisë së tillë nuk i mjaftojnë votat e listës serbe, edhe pse është i varur nga ta”, thuhej në sqarimin e LDK-së.
Dhe “kërcënimi” i Hotit përfundimisht ra në ujë sot kur LDK dha votën “pro” çka paraprakisht e konfirmoi në seancë edhe vet shefi i deputetëve të LDK-së.
“Prioritetet që kanë përcaktuar në këtë marreveshje janë negoçiuar në detaje nga ish-ministrat e qeverisë. Kjo marrëveshje është e rëndësisë nacionale dhe nuk mund të lejojmë që kjo marrëveshje të mos ratifikohet. Ajo që kemi thënë të hënën ka qenë se kemi dashur t’i tregojmë qeverisë së marrëveshjet e tilla nuk mund të kalojnë pa votat e opozitës shqiptare”, tha Hoti.
A urdhëroi Mustafa…
Megjithatë Hoti nuk tregoi nëse ka qenë kreu i partisë Isa Mustafa, i cili ka kërkuar që të “kërcënojë” qeverinë Haradinaj me votën kundër IPA-s dhe nëse më pas po ai ka kërkuar që të votohet kjo marrëveshje.
Pavarësisht se kjo mbetet një enigmë, deklarimi i tyre se nuk e votojnë e më pas ndryshimi i qëndrimit brenda 24 orëve është një sinjal i qartë se diçka ka ndodhur.
Kjo lojë e luajtur nga LDK është një autogol për këtë parti pasi që ka gjetur mënyrën më të keqe për të “kërcënuar” Haradinajn, duke futur në lojë ndërkombëtarët dhe donacionin e tyre i fokusuar për të ndihmuar shtetin tonë.
LDK sigurisht se ka hequr dorë nga vota kundër pasi e ka kuptuar se kjo përveç se nuk do t’i pëlqente ndërkombëtarëve njëkohësisht do të fajësosheshin si partia që humbi miliona euro të dedikuara për mirëqenie të qytetarëve.
Ndaj deklarimi i Avdullah Hotit se “i vetmi partner kredibël i BE-së në Kosovë është LDK dhe ne do të ruajmë e forcojmë gjithmonë partneritetin me BE-në”, është një deklaratë sa për të mbuluar gabimin e rëndë të tyre, pra kërcënimin se nuk votojnë pro IPA-s.
Kujtojmë se 71 milionët e BE-së do të ndahen në fushat si; demokracia dhe qeverisja, sundimi i ligjit dhe të drejtat themelore, energjia, konkurrueshmëria dhe inovacioni, arsimi, shëndetësia dhe politikat sociale, bujqësia dhe zhvillimi rural, mjedisi dhe bashkëpunimi regjional. /tesheshi.com/
