“Në këtë 7-vjetor të tragjedisë së 21 janarit 2011, Partia Demokratike dënon dhe njëherë me forcë shkaktarët e 4 viktimave të pafajshme, drejtuesit e opozitës së atëhershme që sot janë në pushtet me vota të krimit e drogës, dhe personalisht Edi Ramën. Ishte pikërisht ky i fundit që u bëri thirrje njerëzve që të sulmonin Kryeministrinë, sipas një plani për të marrë pushtetin me dhunë. Por fatkeqësisht, ishin katër njerëz që ranë viktimë e ambicjeve të shfrenuara politike të Ramës, duke lënë jetën atë ditë. Partia Demokratike i kërkon organit të Prokurorisë që të hetojë mbi organizatorët e dhunës së asaj dite, mbi organizatorët e një puçi, që synonin pushtetin me çdo çmim, edhe me gjakun e njerëzve të pafajshëm. Katër jetët e humbura kërkojnë shpagim. Dhe kjo duhet kërkuar tek ndëshkimi me patjetër i njeriut që i çoi në atë kasaphanë, Edi Rama”.
Nëse PD do i qëndronte koherente pozicionimit të saj karshi “21 janarit”, me patjetër që duhej të kishte nxjerrë një deklaratë të tillë në 7-vjetëshin e asaj ngjarjeje tragjike. Deklarata është vetëm një sajesë, krijuar duke marrë si lëndë të parë qëndrimet e saj në periudhën post-tragjedi.
Nuk bën të heshtë, derisa nuk ka heshtur që në fillim e më tutje, edhe pse ka ardhut në një mekje totale. Kjo e penalizon rëndë, politikisht po e po, por dhe penalisht, atë pjesë të drejtuesve të saj që ishin me përgjegjësi ekzekutive atë ditë, ku veçojnë ish-kryeministri Berisha e ish-ministri i Rendit Lulzim Basha.
Post-21 janari u shoqërua nga dy linja qëndrimi politik: nga PS e cila kërkonte përgjegjësit penale të vrasjes së katër njerëzve, dhe nga PD që i shmangej penales duke u drejtuar kah përgjegjësia politike.
“Po kush i çoi atje?”, ka qenë pyetja retorike bazë e demokratëve, për t’ja mveshur pikërisht Ramës përgjegjësinë e përgjakjes tragjike të asaj dite. Po, është plotësisht e vërtetë që Rama i çoi, pse jo edhe duke i frymëzuar për akte dhune në forma të kamufluara, por nga aspekti i ftohtë penal fajësia e tij nuk përfshin tërheqjen e këmbëzës për të marë katër jetë njerëzish. Rama do ishte i penalizuar, madje dhe i turpëruar, nëse nuk do kishin ndodhur ato vrasje. Madje me gjasë kjo duhet të jetë menduar nga ideatorët a urdhërdhënësit për hapje zjarri, për t’u përjetuar si pendesë ndaj një akti të nxituar, dhe me koston e humbjes së pushtetit.
E tashmë 21 janari e ndjek si hije atë që sot është dyshja drejtuese e PD-së. Fakti që nuk arrijnë të mbajnë një qëndrim çdo përvjetor, edhe politik, të bëjnë një deklaratë, i lë në një pozitë faji që vështirë se mund ta shlyejnë, por vetëm e thellojnë. /tesheshi.com/
