Ish-fotoreporteri i “Koha Jonë”, Gent Shkullaku ka treguar ngjarjet e tmerrshme të ’97 dhe se si arriti të filmojë momentin kur ish zv.kryeministri, njëherësh kryetar i PD-së, Tritan Shehu u mor peng në qytet. Fotot e pabotuara më parë.
“Ishte shumë e vështirë të punoje në atë kohë. Mbaj mend që një ditë na dolën maskat. Madje në Tiranë. Ishte e tmerrshme.
Por më shumë në mendje më ka mbetur marrja peng e Tritan Shehut. Sot po publikohet për herë të parë 7 fotografi nga ai moment. Duket qartë që personat e kanë marrë peng.
Një prej tyre po e qëllon me presh në kokë, ndërsa unë e fotografova. Ishte një situatë e pabesueshme”, tha Shkullaku, në emisionin e mbrëmshëm “Debat në Channel One” të gazetarit Roland Qafoku.
Gent Shkullaku, atëherë fotoreporter i gazetës “Koha Jonë”, kujton se ishte në stadium, kur një helikopter nga Tirana, solli Tritan Shehun.
Sapo Shehu zbriti, u rrethua nga lushnjarë të zemëruar të cilët një ditë më parë kishin marrë lajmin e falimentimit të firmës Xhaferi. Në të gjitha fotot duket Tritan Shehu i rrethuar prej zemërimit të banorëve.
Shkullaku kujton se njerëzit e qëllonin me presh dhe Shehu ishte vetëm, i shoqëruar nga një polic një çast, mandej edhe ai iku.
Shkullaku kujton gjithashtu se edhe helikopteri që e solli Shehun në Lushnjë iku. Më pas rreth darkës, ai u largua me një makinë, nga Lushnja, pasi e lejuan banorët. /tesheshi.com/
